Foto: istockphoto
Búginde «Qazaqstannyń ulttyq elektrondyq kitaphanasy» atty aqparattyq júıe jumys istep tur. Bul júıede 80 myńnan astam kitap, dıssertasııa, gazet pen jýrnaldardyń elektrondyq kóshirmeleri jınaqtalǵan.
Oljas Bektenov jaýabynda aqparat salasyndaǵy prosesterdi avtomattandyrý men júıeleý úshin «Biryńǵaı medıa-platforma» aqparattyq júıesin qurý jumystary júrip jatqanyn habarlady. Atalǵan júıeni qurý maqsatynda Jasandy ıntellekt jáne sıfrlyq damý mınıstrligi tıisti qyzmetterdi atqaryp jatyr.
Platforma iske qosylsa gazetter men jýrnaldar saqtalyp, oqyrmandardyń BAQ materıalyna jyldam ári yńǵaıly túrde qol jetkizý múmkindigi artpaq.
Sıfrlandyrý – jańashyldyq úrdisi
«Aldaǵy ýaqytta «Biryńǵaı medıa-platforma» men «Qazaqstannyń ulttyq elektrondyq kitaphanasy» aqparattyq júıeleri ıntegrasııalanady. Eki júıeni ıntegrasııalaý barysynda gazetter men jýrnaldardy esepke alý, olarǵa qoljetimdilikti qamtamasyz etý, elektrondyq jáne sıfrlyq formatqa kóshirý boıynsha biryńǵaı qaǵıdalardy ázirlenip, bekitiledi», delingen Premer-mınıstr jaýabynda.
Oljas Bektenovtiń aıtýynsha, elimizde 5 029 buqaralyq aqparat quraly, sonyń ishinde 2025 jyldyń qorytyndysy boıynsha el aýmaǵynda 515 jańa BAQ tirkelgen. Al oblystyq, aýdandyq, qalalyq gazetter kitaphanalarda, baspasóz basylymdardyń qorlarynda jáne jeke arhıvterde saqtalyp keledi.
2026 jyl Sıfrlandyrý jáne JI jyly dep jarııalandy: Prezıdent jarlyqqa qol qoıdy
«Almaty qalasynda 1988 jyldan bastap shyǵatyn «Almaty aqshamy»men 1936 jyldan beri jaryq kóretin «Vechernıı Almaty» gazetteriniń barlyq sanynyń tigindileri «Alataý aqparat» JShS medıaholdınginde saqtaýly. Eki gazettiń 1970-2021 jyldardaǵy sandary sıfrlandyryldy. Sıfrlandyrylǵan basylymdardyń jalpy kólemi – «Almaty aqshamy» 3 306 gazet (56,75 %), «Vechernıı Almaty» 8 551 gazet (65 %). Qalǵan kezeńder boıynsha sıfrlandyrý jumystary jalǵasyp jatyr. Abaı oblysynda 1943-2025 jyldar aralyǵynda jaryq kórgen 16 gazettiń 18 323 danasy saqtaýly tur. Almaty oblysynda 16 gazet, 4 jýrnal jumys isteıdi, jınaqtalǵan tigindilerdi sıfrlandyrý jumysy qolǵa alyndy. Aqtóbe oblysynda «Aqtóbe Medıa» JShS qarasty oblystyq qoǵamdyq-saıası «Aqtóbe» gazeti 1924 jyldan, «Aktıýbınskıı vestnık» gazeti 1918 jyldan bastap shyǵyp keledi. Osy gazetterdiń elektrondyq (PDF) formattaǵy danalary ózderiniń arhıv qorynda saqtaýly tur. Sondaı-aq,12 aýdandyq gazet jumys isteıdi, olar qazirgi tańda jekeshelendirilip, aptasyna 1 ret shyǵady. Bul aýdandyq gazetterdiń qorlary memlekettik kitaphanalarǵa tapsyrylǵan», delingen Úkimet basshysynyń jaýabynda.
Basylymdardy saqtaý jáne sıfrlandyrý isi barlyq óńirde jolǵa qoıylǵan. Máselen, Aqmola oblysynda 40 gazet shyǵady. Sondaı-aq 1941-2025 jyldarda jaryq kórgen 120 466 dana gazet saqtalǵan. Al Atyraý oblysynda qalalyq kitaphanaǵa 1921-1922, 1930-2021 jyldardy qamtıtyn gazetter saqtaýǵa alynǵan. Onyń 9 983 beti sıfrly formatqa kóshirilgen. 1974-2025 jyldardaǵy gazetterdiń tigindileri fotosýret nusqasynda jáne elektrondyq formatta redaksııada saqtalyp tur. Qyzylorda oblysynda gazetterdi saqtaý jáne sıfrly formatqa kóshirý jumystary júrip jatyr. Sıfrlanǵan gazetter elektrondy qorǵa engizilgen. Premer-mınıstr jaýabynda ózge aımaqtaǵy basylym qorlary da jeke arhıv jáne kitaphanada saqtaýly ekenine nazar aýdarǵan.
Osy baǵyttaǵy mańyzdy jumysty birizdendirý maqsatynda «Biryńǵaı medıa-platforma» jáne «Qazaqstannyń ulttyq elektrondyq kitaphanasy» aqparattyq júıeleri birlesip jumys atqarady.
