«Qazaqstan» telearnasynyń dırektory Erkin Muhamedjanov, «Qazsport» telearnasynyń dırektory Pavel Sybýlın, «Tamasha Tv» telearnasynyń dırektory Esen Eleýken, «balapan» telearnasynyń dırektory Maqpal Jumabaı jáne aımaqtyq habar taratýdy damytý dıreksııasynyń dırektory Erjanar Ásheıhan qatysqan sharada Naýryz merekesine daıyndaǵan arnaıy jobalarymen tanystyryldy.
«Qazsport» telearnasy meıram kúnderi tikeleı efırde fýtboldan Qazaqstan Ulttyq quramasynyń Eýropa chempıonatyna irikteý oıyndaryn, birqatar qyzyqty baǵdarlamalar, derekti fılmder men sport sańlaqtarynyń suhbattaryn kórsetetin bolady.
2018 jyldyń 1 qyrkúıeginen habar tarata bastaǵan «Tamasha tv» arnasynyń dırektory Esen Eleýken de birneshe jańalyqtarymen bólisti.
Onyń aıtýynsha, jańa maýsym aıasynda bıyl kórermenderge 14 joba tartý etpek. Alǵashqy 8 joba naýryz aıynda shyqsa, qalǵan 6 jobany sáýirge josparlanǵan. Olardyń barlyǵy jańadan shyǵyp jatqan baǵdarlamalar. Eń basty úlken jobalardyń biri - «Tamasha Club». «Bir ǵanıbet» jobasyn da erekshe atap ótkim keledi, bizdiń belgili aǵa-ápkelerimiz ózderiniń basynan ótken ázilge toly qyzyqty oqıǵalarymen bólisedi» dedi E.Eleýken.
Kishkentaı kórermenderge arnalǵan «balapan» telearnasy osy kóktemgi telemaýsymda kórermen nazaryna barlyǵy 22 joba usyndy. Onyń ishinde 6-y ishki ónim, al 10-y sheteldik úzdik anımasııalar men derekti fılmder toptamasy, 3 telehıkaıa jáne 3 You Tube –qa arnalǵan jobalar. «balapan» arnasy bıyl 22 naýryz – Ulystyń uly kúnine oraı arnaıy merekelik jobalar da daıyndaǵan. Telearnamen únemi shyǵarmashylyq baılanysta bolyp, belsendilik tanytqan Elorda mektepteri arasynda «Narýyz-dýman» atty ulttyq oıyndar ótkizilmek. Munda 8-9 jasar mektep oqýshylary «buqa tartys», «kúı tartys», «qazaqsha kúres», «jamby atý», «asyq atý» sııaqty ulttyq oıyndar boıynsha saıysqa tústi. Bul jobanyń televızııalyq nusqasy mereke qarsańynda efırden kórsetiledi.
«Qazaqstan» teleradıokorporasııasynyń quramyna kiretin aımaqtyq telearnalar da naýryz merekesine oraı birqatar arnaıy jobalar daıyndaǵanyn atap ótti.
Aımaqtyq habar taratýdy damytý dıreksııasynyń dırektory Erjanar Ásheıhan birneshe jobalarǵa toqtalyp ótti. 2019 jyldyń 22 naýryzynda Ulystyń uly kúninde Korporasııanyń aımaqtyq arnalarynda bir mezgilde kóktemgi jańa televızııalyq maýsymy bastalmaq. Aımaqtyq telearnalardy qosyp alǵanda, barlyǵy 61 jańa baǵdarlama efırge josparlanǵan. 22 naýryz kúni «ALTAI», «OŃTÚSTIK», «AQTÓBE», «MAŃǴYSTAÝ» arnalary «QAZAQSTAN» ulttyq arnasyna tikeleı efırde qosylyp, aımaqtaǵy Naýryz merekesiniń toılaný týraly qyzyqty málimetter men sıýjetter beredi.
