Byltyr Indonezııada ótken Azııa oıyndarynda djıý-djıtsýdan jarys synaqtyq rejımde uıymdastyrylǵan bolatyn. Jerlesterimiz aıtýly dodada keremet óner kórsetip, 2 altyn jáne 3 qola medaldi qorjynǵa saldy. Atap aıtsaq, Darhan Nortaev pen Rýslan Israılov altyn tuǵyrǵa kóterilse, Nurjan Seıdýálı, Nartaı Qajekov jáne Rızat Maqashev úshinshi satyǵa taban tiredi. Jalpy komandalyq esepte Qazaqstan quramasy ekinshi oryndy oljalady.
Sonymen qatar, ústimizdegi jyldyń 19-23 maýsym aralyǵynda Astanada djıý-djıtsýdan Grand Prix Astana Open asa iri halyqaralyq týrnıri uıymdastyrylady. Sol jarysta 60 memleketten kelgen saqa sportshylar kúsh synasady dep kútilýde.
Ǵalym SÚLEIMEN,
«Egemen Qazaqstan»
