«Jobalyq keńse bıznes jospardy ázirleý kezeńinen bastap, qarjylandyrýǵa deıin qoldaý kórsetedi. Ári, jobalardy iske asyrýǵa turaqty monıtorıng júrgizedi. Kásip kózin ashqan azamattarǵa «qolma-qol» kómek beredi», deıdi qalalyq kásipkerler palatanyń dırektory Nurlan Qabyshtaev.
Atalǵan jobalyq alqaǵa qala ákimdigi men kásipkerlik jáne ındýstrıaldy-ınnovasııalyq damý basqarmasy, aýyl sharýashylyǵy basqarmasynyń basshylary, ekinshi deńgeıli bank dırektorlary, «Damý», «QazAgro», Agrarlyq nesıe korporasııasynyń ókilderi kiredi.
Esterińizge salar bolsaq, bıyl Prezıdent tapsyrmasymen Qazaqstan Úkimeti halyq tutynatyn taýarlardy, sondaı-aq shıkizat jáne bastapqy óńdeý ónimderin óndirýdi qoldaý úshin 600 mlrd teńge bóldi. Osy tapsyrma sheńberinde ekinshi deńgeıli bankterdi uzaq merzimdi teńgelik ótimdilikpen qamtamasyz etý jónindegi baǵdarlama quryldy. Atap aıtqanda, bul qarajat óńdeý ónerkásibi, agroónerkásip keshenin damytý men qoldaýǵa baǵyttalady.
Nesıeleý sharttary boıynsha qaryz berý merzimi 9 jyldy quraıdy. Qaryz alýshylar úshin syıaqynyń ataýly mólsherlemesi «Bıznestiń jol kartasy-2020» baǵdarlamasy sheńberindegi sýbsıdııalaý esebinen 8 paıyzǵa teń.
Baǵdarlama aıasynda daıyn ónim óndirisine ǵana emes, sondaı-aq, qajetti shıkizat jáne bastapqy óńdeý ónimderin shyǵarý (máselen, qant qyzylshasy; qant; kondıter ónimderi) sonymen qatar daıyn ónimdi ótkizýge qoldaý kórsetiledi.
Keshendi jumys jańa óndiristerdi qurý, qoldanystaǵy kásiporyndardy modernızasııalaýǵa múmkindik beredi. Atalǵan aǵdarlama jumysyna elimizdegi ekinshi deńgeıli 8 bank qosyldy.
Jalpy baǵdarlama 2025 jylǵa deıin taýardyń 365 túri boıynsha óndiristi 2,4 esege ulǵaıtýǵa, sonymen qatar, ımporttyń úlesin 37 paıyzǵa qysqartýǵa múmkindik bermek.
Nurshat TО́KEN,
«Egemen Qazaqstan»
Shymkent
