Qazaqstan Prezıdenti Nursultan Nazarbaevtyń óz ókilettiligin toqtatý týraly sheshimi men úshin kútpegen jaǵdaı boldy. Bul jańalyqty ekiudaı sezimde qabyldadym. Bir jaǵynan el basqarý isine jastardy tartý týrasyndaǵy ustanymyn qoldasam da, ekinshiden jan-dúnıemizde qımastyq qalyp otyr. Barshamyzdyń kóńilimizdiń tórinen oryn alǵan qaıratkerdiń bul sheshimi kóńildi tolqytyp jiberdi.
Nursultan Ábishulyn óz basym 1991 jyldan beri tanımyn. Ol baýyrlas ázerbaıjan halqy úshin de talaı eńbek sińirgen, bizdiń eldiń de beıbit kúnge qol jetkizýi jolynda ter tókken tulǵa. Únemi Taýly Qarabaq máselesinde Ázerbaıjan elin qoldap keldi.
Sonymen qatar óńirdiń qaýipsizdigi máselesine, jahandaǵy beıbitshilikti saqtaý isine úles qosqan qaıratker. N.Nazarbaevtyń álem elderin ıadrolyq qarýdan bas tartýǵa udaıy shaqyryp kele jatqany, beıbitshilik saqtaý jolynda birqatar elderdiń arasynda araǵaıyndyq jasaýy, Sırııadaǵy, Aýǵanstandaǵy soǵysty toqtatýǵa baǵyttalǵan bastamalary, ıntegrasııalyq prosesterge erekshe kóńil bólýi bárimizdiń kóńilimizden shyqqan bolatyn.
Sondaı-aq Qazaqstannyń Tuńǵysh prezıdentiniń bastamasymen baýyrlas elderdiń arasyndaǵy saıası, ekonomıkalyq, mádenı-gýmanıtarlyq baılanystar nyǵaıyp, týys halyqtar bir-birine jaqyndasa tústi. Nursultan Nazarbaev kúlli túrki áleminiń Aqsaqalyna aınaldy. Búginde ol jasy jóninen de, saıası tájirıbesi men danalyǵy turǵysynan da barshamyzdyń Aqsaqalymyz.
О́z basym bul mártebeni eń úlken qurmet dep bilemin. Túgel túrkiniń júreginiń tórinen alǵan Aqsaqalymyz resmı laýazymynan bas tartqanymen, áli de óziniń aqyl-keńesi, tájirıbesi arqyly bizdiń elderdiń arasyndaǵy yntymaqtastyqty tereńdetýge atsalysady degen oıdamyn.
Rasım Mýsabeıov,
Ázerbaıjan Respýblıkasy Mıllı Medjlısiniń depýtaty
