Oblys ortalyǵyndaǵy «Statýs» oıyn-saýyqtyq kesheniniń dırektory Asqar Bilálov Taldyqorǵan qalasynyń turǵyny Indıra Qarabekovaǵa úsh bólmeli páter satyp alyp berdi.
- Qarabekovter januıasyn biraz ýaqyttan beri bilemin. Buǵan deıin azyq-túlik sebetteri túrinde qaıyrymdylyq kórsetkenbiz. Úılerine kelgen saıyn laıyqty ómir súrýge jaǵdaı jasalmaǵanyn baıqaıtynmyn. Sondyqtan Naýryz merekesi qarsańynda osyndaı syılyq jasaýdy sheshtik, - deıdi kásipker.
Segiz balasy bar Indıra Qarabekova buǵan deıin saıajaıdan páter jaldap turyp kelgen. Kásipker Asqar Bilálov bul otbasyna únemi qol ushyp berip júredi eken. Al 3 bólmeli úıdiń kiltin syıǵa alǵany kútpegen qýanysh boldy. Kásipker pátirdi tolyq jóndep, kerekti jıhazdaryn da satyp alyp beripti.
- Bizdiń jeke úıimiz bolady dep armandaıtynbyz. Biraq bul armanymyz osynshama jyldam oryndalady dep oılamappyn. Asqardyń jasaǵan jaqsylyǵy úshin alǵys bildiremin. Búgin bizdiń ómirimiz kúrt ózgerdi, - deıdi kópbalaly ana Indıra.
Qalmahanbet MUQAMETQALI,
«Egemen Qazaqstan»
Almaty oblysy
