Atalǵan fıto-barda aldaǵy ýaqytta kelýshilerge arnalyp emdik ósimdikterden daıyndalǵan túrli taǵamdar men sýsyndar, densaýlyqty jaqsartatyn dıetalyq ónimder usynylady. Sonymen qatar, ortalyqtyń negizgi maqsaty salaýatty ómir saltyn ustanýdy nasıhattaý bolyp tabylady. Bul oraıda Jambyl oblystyq densaýlyq saqtaý basqarmasynyń basshysy Marat Jumanqulov fıto-bar emdeý-saýyqtyrý ortalyǵynyń ereksheligi men paıdasyna toqtalyp, halyq densaýlyǵyn arttyrýǵa zor úles qosatynyn aıtty.
Atalǵan jobany oblys ákiminiń ıdeıasymen jeke kásipker Qadyrhan Abdýllaev qolǵa alyp, júrgizip keledi. Bul jerde elimizdiń ár túkpirindegi taýly aımaqtardan terilgen 100-den astam shóp túrleriniń emdik qasıetteri paıdalanylady. Ortalyq ǵımaratynyń aýmaǵy 700 sharshy metrdi qurasa, mańynda jalpy aýmaǵy 1,8 gektardy quraıtyn saıabaq ornalasqan. Munda barlyǵy 30-35 adam jumys atqarady. Olardyń qatarynda shóppen emdeıtin, pedıatr, terapevt dárigerleri bar. Ortalyqta táýligine 150-200 adamdy qabyldaýǵa múmkindik jasalǵan. Sonymen qatar, munda negizinen emdik shópterden daıyndalǵan sháılarmen emdeý sharalary júrgizilmek. Al taǵamdar mázirinde dıetalyq ónimderge basymdyq beriledi. Emdik shópterdi paıdalanýda «Zerde-Fıto» JShS-men birlesip eńbek etetin bolady.
Hamıt Esaman,
Egemen Qazaqstan
Jambyl oblysy
