21 naýryz kúni keshki saǵat 21-52-de «102» pýltine belgisiz adam habarlasyp, ortalyq kópirden bir adamnyń sýǵa sekirgenin jetkizdi. Atyraý qalalyq polısııa basqarmasynyń jeke quramyna shuǵyl arada habar berildi. Oqıǵa ornyna birinshi jetken patrýldik polısııa serjany Shalqar Aqymǵalıev oılanbastan muzdaı sýǵa sekirgen.
«Jaǵalaýda rolıkpen serýendegennen keıin demalyp otyrǵanda sýısıdke tosynnan kýá boldyq. Men birden polısııaǵa habarladym. Sanaýly sekýndtar ishinde oqıǵa ornyna jetken polısııa qyzmetkerleriniń biri batyp bara jatqan adamǵa tez júzip bardy. Sý muzdaı, oǵan qosa qatty aǵys qyzdy qalaı aǵyzyp bara jatqany da kórinip turdy. Biraq, polısııa qyzmetkeri óz ómirin táýekelge tigip, batqan adamdy qutqarýǵa talpynysyn toqtatqan joq», deıdi oqıǵa kýágeri Raıymbek Sarbalın.
Shalqarǵa kómekke ózimen birge bóreneni alyp sýǵa túsken polısııa kishi leıtenanty Rústembek Súndetov umtylǵan.
«Sýǵa batqan adamǵa jetken kezimde Shalqar aǵysqa tótep bere almaı batyp ketti. Áıeldi qutqarý mańyzdy boldy. Onyń ústine áıel «ol men úshin óldi» dep aıqaılap, esti shyǵardy», dep eske alady Rústembek Súndetov.
Ajaldan qutqarylǵan Batys Qazaqstan oblysynyń týmasy jedel járdem kóligimen oblystyq aýrýhanasynyń reanımasııa bólimshesine jetkizilgen. Al Rústembektiń áriptesin óz betinshe izdeýi esh nátıje bermedi. 3 gradýs muzdaı sýda sińiri tartylǵan 30 jastaǵy kishi leıtenant Súndetov jaǵaǵa ózi júzip jetken.
«00-50-de Shalqar Aqymǵalıevtiń múrdesi oqıǵa ornynan tómen jaqtan tabylyp, jaǵaǵa shyǵaryldy. Shalqar Aqymǵalıev kópbalaly otbasynyń jalǵyz asyraýshysy. Boıdaq, 1 sáýirde 25 jasqa tolatyn edi. Otanyna 5 jyl boıy adal qyzmet etip kele jatqan ol sýǵa batqan áıeldi qutqaramyn dep óz ómirin qıdy. Ishki ister organdarynyń basshylyǵy men jeke quramy qaza bolǵan azamattyń otbasy men týǵan-týystaryna qaıǵyryp kóńil aıtady», dedi IIM keńesshisi - resmı ókil Nurdildá Oraz.
