О́tken 30 jyl ishinde Qazaqstan atyn álemge áıgileýden bólek shekaramyzdy shegendeý, onyń ishinde ortaq ózenderdi bólisýdiń qanshalyqty mańyzdy bolǵanyn, bir ǵana Kaspı teńiziniń mártebesine qatysty uzaqqa sozylǵan kelissózderdiń jemisi aıaqtalýyn keler urpaq maqtanyp aıtyp júretin bolady.
Elbasy el ishindegi áleýmetik jaǵdaıdyń jaqsarýyna, mádenıet pen bilimniń órkendeýine, sport pen densaýlyq salasynyń damýyna birinshi kezekte kóńil bóldi. Ony biz óz balalarymyzdyń bilim, ǵlymy, óner jarystaryna qatysyp, álemniń ozyq memleketterinń oqýshylarynan ozyp kelgeninen kórip otyrmyz. Sport salasyndaǵy jetistikter týraly aıtsam, uzaq tańǵa jetedi. Áleýmettik jaǵdaıdyń kóterilýin, kópbalaly analarǵa qatysty qoldaý sharalarynyń jolǵa qoıylǵanynan habardarmyz. Elbasy óz Joldaýynda azamattardy Otanshyl bolýǵa, týǵan jerin túletýge úndedi ǵoı. Onyń naqty joldaryn kórsetip te berdi. Halqymyzdyń ál-aýqatyn arttyrýǵa, turmysyn túzeýge Úkimet bilek sybanyp kirisip jatyr. Tuńǵysh Prezıdenttiń muǵalimderdiń mártebesin kóterýge, dárigerlerdiń jalaqysyn kóbeıtýge tapsyrma bergeni sol kezde-aq el ishin súısindirip tastady. Elbasynyń tarıhı mıssııasyna qatysty aıtqanda aldymen osy jaǵdaılar oıyma oraldy.
Al elordamyzǵa Elbasy esimin berý máselesi ýaqyttyń kóriginde pisip, jurttyń júreginde naqtylanǵan sheshim. Jalpy, Almaty – burynǵy bas qala. Búginde bul uly mıssııany Astana arqalap, qazaqtyń kóshin alǵa súırep keledi. Biz kórgen toqsanynshy jyldardyń basynda Aqmola dep atalatyn kishkentaı ǵana kent edi.Soltústik aımaqtyń klımaty qatal jazyq dalasynda ornalasqan shaǵyn shahar kóp uzamaı toty qustaı túrlenip, jerdegi jumaqqa aınaldy. Ǵajaıyp qubylystyń avtory – Qazaqstannyń Tuńǵysh Prezıdenti Nursultan Nazarbaev. Ol qalanyń sáýlettik konsepsııasyn ázirlep, aýmaǵyn keńeıtti. Qazir otyz jyl burynǵy Aqmola men búgingi Astananyń kelbetin salystyrǵanda, jer men kókteı aıyrmashylyqty esh qıyndyqsyz baıqaýǵa bolady. AQSh memleketi de astanasyn Vashıngton dep atady emes pe?! Vetnamdyqtar da birinshi Prezıdentiniń qurmetine bir qalasyn Hoshımın dep ózgertti. Yrymshyl qazaqpyz, jolyn bersin, Astana ataýyn Nursultan dep aýystyrýdy bárimiz qoldaǵanymyz jón.
Biz bul sheshimdi qoldaý arqyly Elbasyna degen qurmet pen alǵys sezimin ǵana emes, Nazarbaevpen birge órkendegen Qazaqstannyń nyǵaıýyna da óz baǵamyzdy bergenimizdi bildiremiz. Sondyqtan, Nur – Sultan ataýy elordaǵa ábden jarasymdy.
Jaqsylyq ÚShKEMPIROV,
Qazaqstannyń Eńbek Eri,
«Jaqsylyq» sharýa qojalyǵynyń basshysy
Almaty oblysy
