Qara jerge halyq ıe bolǵannan muraqty jannyń muraty – eldi el qylý. Jel úıir jelbegeı jurttyń qamsaýy, qalqany bolý áste ońaı emes. Jazǵyturymǵy jelkemikteı ońnan da, soldan da esetin dúrııa dúnıede turlaýly temirqazyq qajet. Biraz jyl buryn Elbasy Nursultan Nazarbaev aıtqan biraýyz sóz jıi eske túsedi. «Táýelsizdikti sát saıyn qorǵaýymyz kerek» degen-di Qazaqstannyń Tuńǵysh Prezıdenti. Jahanǵa málim bolǵan «Nazarbaev modeli» arqyly bir jaǵadan bas, bir jeńnen qol shyǵara bilgen birligimen qazaqstandyqtar bul baılamdy baıyppen bekitti. Elbasynyń jetekshiligimen Qazaq eli keńesten qalǵan «tarıhı» muralardy da, álem keńistigindegi geosaıası ornyn da eldiń erekshe jetistikterine aınaldyra bildi. Buǵan mysal retinde búgingi Qazaqstannyń jappaı qyryp joıatyn ıadrolyq qarýǵa qarsy jáne jahandyq beıbitshil, bitimgershil saıasatyn, sondaı-aq Eýrazııanyń apaıtós dalasynda alyp memleketterdiń arasynda saýda-kólik logıstıkasy retinde qarqyndy damýyn aıtý jetkilikti. Uly dala tósinde adamzat kóshin ǵalamat baǵytqa burǵan saqara saltanatyn tııanaqtap, túp tegimizdiń kósheli tarıhyn Táýelsiz Qazaqstannyń tańdaýymen sátti sabaqtastyrǵan Elbasynyń eldik sanany eseleı túsken eńbegi elendi.
Memleket basshysy Qasym-Jomart Toqaevtyń prezıdenttik qyzmetine kiriskendegi Astana ataýyn Qazaqstannyń Tuńǵysh Prezıdentiniń esimine aýystyrý týraly alǵashqy usynysy da qasterli Táýelsizdik tóńiregine toptasqan turaqty damý ıdeıasyn nyqtaýdyń, odan ári nyǵaıtýdyń naqty kórinisi ispetti. О́ıtkeni eńseli elorda elimizdiń táýelsizdikke tán jańa passıonarlyq rýhyn qalyptastyrdy, óńirlerdiń damýyna serpin bergen qozǵaýshy kúshke aınaldy. Endi, mine, jańa turpatty Qazaqstannyń jańa damý jolyndaǵy ulan-ǵaıyr maqsat-mindetterine Nur-Sultan ataýymen taǵy da tý alyp shyqqandaı.
Álbette, qala ataýy, onyń ishinde astanalar ataýy – eldiń enshiles bir atrıbýty sanalady. 20 jyldyq belesinde elordamyzdyń Astana ataýy da álemge máshhúr bolyp, eldiktiń erekshe nyshany, biregeı brend retinde tanyldy. Búginde baqordamyzǵa aınalǵan bas qalada Astana ataýymen qosarlana atalatyn qanshama áleýmettik-mádenı nysandar bar. Máselen, «Astana-Opera», «Astana-Arena», «Nur-Astana», «Eır-Astana» jáne «Astana» atalatyn sporttyq klýbtar men telearnalar týraly aıtsaq ta jetkilikti bolar. Aqparat jáne qoǵamdyq damý mınıstri D.Abaev búkil dúnıege belgili bul brendtiń saqtalatynyn, sonymen birge «Nur-Sultan» ataýyn jańa brend retinde damytýdyń áleýeti zor ekenin jetkizgen bolatyn.
Jalpy, eldiktiń eń áýelgi irgetasyn qalaǵan memleket qaıratkerleriniń esimin elordalarǵa berýdiń úlgili úrdisi burynnan bar. Bul rette tarıh paraqtarynan san mysal keltirýge bolady. Jáne bul ataýlardyń basym bóligi belgili dárejede halyqtyń, memlekettiń bolmys-bitimimen astasyp, sińisip ketedi.
Tumandy kúnderi, kúnderi emes-aý, dini basqa, dili basqa jurttardan suraýsyz tańylǵan el-jer, shár ataýlary jaýyr attaı jortaqtatqan, arqany aıazdaı qaryp, shemen sher bolyp qatqan arty jar, aldy tuıyq bolǵan qysyltaıań dáýirlerde, tutas kezeńderde ómir súrgen halyq eldik sanamen, memlekettik múddemen qabyl alǵan bul jańa ataý tarıhı máni tereń, arqalar júgi aýyr qasterli qundylyqqa qurmet bolýǵa tıis!
Dýman ANASh,
«Egemen Qazaqstan»
