Qudaıshylyǵyn aıtqanda, qazaq óneri buryn-sońdy osynshama bıik beleske kóterilmegeni anyq. О́zimizdiń barymyzdy baǵalamaı, Batystyń da, basqanyń da bolymsyz áýenine eliktep, kelgenimiz kúni keshe ǵana edi. Sóıtse, ol bizdiń ulttyq ónerimizdiń osaldyǵynan emes eken. Ánshiniń ónerimen, tabıǵı talantymen astasqan qubylys kórinedi. Talantyń bolsa, tilińdi túsinbese de, kúlli álem túgeldeı súısine tyńdaıdy eken-daǵy. Ol áýeli Qytaı elindegi halyqaralyq baıqaýda qazaq óneriniń adam balasy tańdaı qaǵarlyq keń dıapazondy tynysyn tanytyp, al keıinnen ánshilik áleýeti arqyly talaı-talaı jurttyń júregine jol tartty. Alash ánshisiniń tańǵajaıyp daýysyna uıyǵandar qazaq ániniń ózine ǵana tán qudiretin moıyndady. О́ner qonǵan irgeli ulttan, qabiletti halyqtan daryndar men talanttar shyqpaı turmaıdy eken. Dara talant. Tipti búgingishe aıtqanda megatalant. Ol bizdiń Dımash! Lara Fabıansha qaıyrar bolsaq, «Ǵarysh balasy».
Naýryz merekesinde eki kún boıy – 22-23 naýryzda Memlekettik Kreml saraıynda esten ketpes erekshe konsertin ótkizý án-qudiret –Dımash Qudaıbergenniń dara qabiletin taǵy bir márte dáleldedi. «Aıshylyq alys jerlerden jyldam habar alǵyzǵan» myna zamanda Dımashtyń Kreml saraıyndaǵy úsh saǵattyq konsertine bıletti úsh-tórt aı buryn satyp alyp, muhıttardy, elderdi artqa tastap kelgen jandar qanshama. Eki kún boıy 6 myń oryndyq záýlim saraıǵa lyqa tolǵan kórermender arasynda qaı ulttyń ókili joq deısiz. Qytaı, Amerıka, Fransııa, Anglııa, Reseı sııaqty mýzykanyń maıyn ishken alpaýyt elderdi aıtpaǵanda, álemniń 50-den astam elinen kórermenderdiń Kremlge at basyn tireýi qazaq ánshisiniń álemdegi erekshe fenomen ekenin uǵyndyrsa kerek-ti.
Ǵabıt ISKENDERULY,
«Egemen Qazaqstan»
