Bul Tuńǵysh Prezıdenttiń jas kezinen dana qarttarmen kóp áńgimeleskeniniń belgisi bolsa kerek. Ári qazirgi zamanda til baılyǵyn qalyptasyryp, saqtap qalý úshin kórkem kitapty kóp oqý kerek. Demek, Elbasynyń kitapty kóp oqıtyny, onyń ishinde qazaqtyń kóne tiliniń qaımaǵy saqtalǵan shyǵarmalardy únemi oqıtyny ańǵarylady. Bul jerde adamnyń qany men tegine qatysty da dúnıe bar. Qandaǵy qazaqylyq, tektegi ulttyq kod, tirshiliktegi ultjandylyq qansha jerden qýatty bolsa da jahandaný men órkenıet soqqysyn darytqan emes. Tipti joǵary elıta arasynda aqsúıekter mádenıetiniń ekspansııasyna jutylyp, tilin joǵaltyp alǵan tulǵalardyń bar ekenin kórip júrgenimiz jasyryn emes.
Elbasynyń osy qazaqylyǵy, qazaqjandylyǵy bolýy kerek, Prezıdent bolysymen álemge tarydaı taraǵan qazaqtardyń basyn qosyp, Almatyda Dúnıejúzi qazaqtarynyń alǵashqy Quryltaıyn ótkizdi. Bul – sonaý Alashorda tusynda ótken Musylmandar quryltaıynan keıin nebir zobalańdy bastan keshirip, eriksiz elinen qashýǵa májbúr bolǵan qazaqtardyń qaıta bir túgendelýi edi. Munyń saıası úlken qyrlaryn aıtpasaq ta, bul Quryltaıdyń ótýi – alashordalyqtar armanynyń oryndalýy ekenin aıtýǵa tıistimiz.
1998 jyly Mońǵolııanyń ekinshi prezıdenti Bagabandı bizdiń elge resmı saparmen keldi. Qabyldaýda biz de bolǵanbyz. Kózben kórip, qulaqpen estidik. Sonda delegasııa quramynda Mońǵolııada turatyn, mınıstr dárejesine kóterilgen qandastarymyz da júrdi. Nurekeń sóz arasynda álgi qazaq baýyrlaryna qarata «Qane, baýyrlarym, jaǵdaılaryń qalaı? Elge qashan oralasyńdar? Senderdi tezirek kelsin dep, Astanany da senderge jaqyndatyp qoıdym», dedi. Elbasynyń resmı qabyldaýda osylaısha, qazaqtardy erekshe baýyr tartyp, qazaqsha sóılegenine mońǵol jýrnalıster tań-tamasha boldy. «Nazarbaev ıýý helev?» («Nazarbaev neni aıtty?») dep bizden surady. Biz túgel aýdaryp berdik. Olar «Nazarbaev eriksiz álemdi moıyndatar kóregen basshy eken!..» desip, tańdanysty.
Mine, biz biletin Elbasy osyndaı adam.
Júkel HAMAIULY,
aqyn, Túrkitildes halyqtar poezııasy festıvaliniń laýreaty
TALDYQORǴAN
