Tikeleı efırde ótken brıfıng barysynda «QazMunaıGaz» UK AQ basqarma tóraǵasynyń óndiris jónindegi orynbasary J.Marabaev Qalamqas ken ornynyń uńǵymasynda bolǵan jaǵdaı týraly aıtty. Aǵymdaǵy jyldyń 13 naýryzynda «Mańǵystaýmunaıgaz» AQ-ǵa qarasty Qalamqas ken ornynyń kúrdeli ýchaskesinde uńǵymanyń qurylysy barysynda ken ornynyń ortalyq bóligine tán tehnogendik sıpattaǵy gaz-sý aralas tabıǵı burqaǵy shyqqan. Naýryzdyń 13-24 kúnderi mamandar kúrdelendirilgen burǵylaý eritindisimen uńǵymany jýý jónindegi jumystardy, sondaı-aq grıfondardy joıý úshin jóndeý-oqshaýlaý jumystaryn júrgizgen. Osy jylǵy 25 naýryzda saǵat 04:46-da 8232 uńǵymanyń aýmaǵynda 16 naýryzda jer betine shyqqan gaz-sý qospasynyń oshaǵy jana bastady. 04 saǵat 58 mınýtta «Semser-О́rt sóndirýshi» JShS jaýyngerlik toby shaqyrylǵan orynǵa keldi. Qurban bolǵan jáne zardap shekkender joq.
Apat ornyna 25 naýryzda saǵat 14:30-ǵa qaraı órtti aýyzdyqtaý úshin qosymsha Aqtaý qalasynyń MО́QQ 6 órt sóndirý toby kelip jetken. О́rtti sóndirýge 4 avtosısterna, 1 jyljymaly sorǵy stansasy, 1 gaz-sý sóndirýshi avtokóligi keltirilgen. Qazirgi ýaqytta órt shyqqan jerde Mańǵystaý oblysynyń TJD, «Semser – О́rt sóndirýshi» JShS jáne «Faır protekshn LTD» JShS jeke quramynyń 53 adamy jáne órt sóndirý tehnıkasynyń 12 birligi jumyldyrylǵan. О́rtti sóndirý barysynda janǵan jerdi tasymaldanatyn lafettik oqpandarmen sóndirý úshin birneshe ret talpynystar jasaldy, alaıda órt oshaǵyna kirme joldardyń joqtyǵyna baılanysty órtti aýyzdyqtaý múmkin bolmady. Operatıvti órt sóndirý shtabyn Mańǵystaý oblysy TJD bastyǵy Q.Bazarbaev basqarýda. Shtab quramyna «Mańǵystaýmunaıgaz» AQ bas dırektorynyń birinshi orynbasary B. Imanbaev, QM Indýstrııalyq damý jáne ónerkásiptik qaýipsizdik komıteti departamentiniń basshysy S.Qazaqbaev, KÁAQQ ROSh Mańǵystaý fılıalynyń (burqaqqa qarsy qyzmet), «SıBý» JShS ókilderi jáne basqalar kirdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
