Sergeı Qalmykov Samarqand qalasynyń týmasy. Máskeýde jáne Sankt-Peterbýrgte oqyp, ómiriniń kóp bóligin Orynbor men Almatyda ótkizgen. Alataý baýraıynda ótkergen shabytqa toly jalyndy jyldary onyń shyǵarmashylyǵyn bıikke kóterdi. Qazaq dalasynyń sulýlyǵy, almatynyń araıly keshteri sýretshiniń darynyna qanat bitirdi. Qylqalam sheberi aspanmen talasqan bıik taýlary, jyly shyraıly adamdary men ózindik qaıtalanbas atmosferasy bar Almatyny únemi qaıtyp orala bergisi keletin «juldyzdy tostaǵanǵa» balapty. Qazaq dalasynyń tumsa tabıǵaty onyń shyǵarmashylyǵynda dara mánge ıe.
Kórmeniń ashylý rásimine qatysqan elimizdiń Sankt-Peterbýrgtegi Bas konsýly Bolat Imanbaev, Reseı jerinde qazaq kórmelerin ótkizý ıgi dástúrge aınalǵandyǵyn atap ótti. «Qazaqstan qazaq ónerin álemde ilgeriletý boıynsha «Rýhanı jańǵyrý» baǵdarlamasyn belsendi túrde júzege asyrýda, jáne «Sergeı Kalmykovtyń juldyzdy tostaǵany» kórmesi osy baǵdarlamanyń qısyndy jalǵasy. Qasteev mýzeıiniń kórmesi iri mádenı muralardyń altyn oshaǵy dep aıta alamyz. Jyl saıyn eki memleket arasyndaǵy mádenı qatynastar qarqyndy jáne ár qıly damý ústinde. Munda mádenıet salasyndaǵy kóptegen is-sharalar, jastarǵa arnalǵan baǵdarlamalar, bıznes-forýmdar ótip turady. Naýryz – jylylyq meıramy, qonaqjaılyq pen tatý kórshilik baılanystardy nyǵaıtatyn erekshe kún. Qazaqstan men Reseı – mádenıet pen bilim berý salasynda kóptegen jobalardy júzege asyryp kele jatqan jaqsy kórshiler», - deıdi konsýl.
Kalmykovtyń kolleksııasy elimizdiń beıneleý óneri tarıhynda aıryqsha oryn alady. Kórmege qoıylǵan ár shyǵarmanyń ózine tán tarıhy bar. Reseılik kórermenniń nazaryna usynylǵan kartınalar jıyntyǵyn ýaqyt pen zaman tynysyn asa dáldikpen bergen biregeı týyndylar quraǵan.
«Sergeı Kalmykovtyń ómiri men qyzmeti – Qazaqstan men Reseıdiń ortaq tarıhı taǵdyry kezeńindegi tyǵyz ózara mádenı baılanystarynyń jarqyn mysaly. Búginde, onyń kóp qyrly shyǵarmashylyǵy zertteýshilerdiń qyzyǵýshylyǵyn týdyrýda. Bizdiń mýzeı úshin kórmeni osyndaı tarıhı mańyzy bar orynda ótkizý úlken qurmet», – deıdi Á. Qasteev atyndaǵy óner mýzeıiniń dırektory Gúlmıra Shalabaeva.
Kórme aıasynda mádenıet salasyndaǵy qazaqstan-reseı qarym-qatynastaryna arnalǵan dóńgelek ústel ótti. Oǵan Reseı Kórkemsýret akademııasy mýzeıiniń dırektory Alekseı Mýdrov, Á. Qasteev atyndaǵy Memlekettik óner mýzeıiniń dırektory Gúlmıra Shalabaeva, Reseı etnografııalyq mýzeıiniń Qazaqstan jáne Orta Azııa bóliminiń jetekshisi Larısa Popova, kórmeniń jetekshisi Erkejan Omarova, Á. Qasteev atyndaǵy Memlekettik óner mýzeıiniń baspasóz qyzmetiniń jetekshisi Klara Isabaeva, ónertaný kandıdaty Ekaterıa Reznıkova, «Osobye mıry Sergeıa Kalmykova» fılminiń avtory Igor Gonopolskıı, keskindeme fakýltetiniń dekany Svetlana Gracheva jáne grafık-sýretshi Latıf Kazbekov qatysyp, jalpy qazaq sýretshileriniń ózgeshe stıli men eki el arasyndaǵy mádenı baılanystar tóńireginde áńgime órbitti.
Arman OKTIаBR,
«Egemen Qazaqstan»
