...rızashylyq bildiredi
Mereıiń ústem bolsyn, bas basylym!
Kópshilik oqyrman úshin «Egemen Qazaqstan» gazetiniń orny erekshe desek, al bıylǵy osy basylymnyń 100 jyldyǵy aıtýly merekelerdiń biri bolyp sanalady. Gazet sonaý alasapyran qıyn kezde qurylyp, odan bergi zamandarda nebir kezeńderdi bastan ótkerse de óz mindetin abyroımen atqara bildi. Ujymdaǵy nebir tarlandar «Bas kespek bolsa da, til kespek joq» degen máteldi óz tuǵyrnamasy ete bildi. Keńes zamanynda nebir ótkir maqalalardyń joly bolmasa, táýelsizdikten soń olarǵa dańǵyl jol ashyldy. Tarıhı taqyryptarǵa tereńdep baryp, tyıym salynǵan tulǵalardyń baǵy jandy. Ásirese batyrlarymyz ben bılerimiz, danalarymyz týraly tereń maǵynaly maqalalardy qalyń oqyrman tushyna oqıtyn boldy. Meniń de tarıh shyndyǵyna arnalǵan maqalalarym jaryq kórdi. Merekeli jyly kópshilik kókeıindegi kúrdeli máseleler óz oraıyn taba bersin degim keledi.
Bolatbek NÁSENOV,
tarıh ǵylymdarynyń doktory
...áserimen bólisedi
Qylqalam sheberi nasıhattaldy
Ortalyqtandyrylǵan kitaphana júıesinde uıymdastyrylǵan arnaıy klýb aıasynda halyq sýretshisi Ábilhan Qasteevtiń 115 jyldyǵyna oraı «О́mir jáne óner» atty otyrys ótti.
Shara basynda kitaphanashy Gúlshat Ismadılova Ábilhan Qasteevtiń qıyndyqqa toly balalyq shaǵy men jastyq shaǵy týraly áńgimeleı kele, sırek beriletin kórkem shyǵarmashylyq darynymen ol jetkinshek kezinde-aq tastar men aǵash qabyǵyna tabıǵattyń sulýlyǵyn beınelegeni jaıly aıtyp berdi. Sondaı-aq Qazaqstannyń ulttyq kórkemsýret mektebiniń negizin qalaýshy, uly sýretshiniń shyǵarmashylyq joly men qalyptasýy týraly aqparat berildi. Qatysýshylar Ábilhan Qasteevtiń «Qazaqstan baılyǵy», «Tyń týraly», «Qazaqstan jerinde» jáne taǵy basqa eńbekteri týraly tereńirek maǵlumat ala bildi. Kitaphanashy sýretshiniń árbir týyndysy – el tarıhy, qazaqstandyq keskindeme tarıhy ekenin atap ótti. Jıyn sońynda «О́mir men óner» atty ashyq kitap kórmesine qoıylǵan qundy dúnıelerge sholý jasaldy.
Raýshan QABJANQYZY,
Semeı
...úmit artady
Múgedek jan bıznesin keńeıtpekshi
Aqmola oblysynyń Jarqaıyń aýdanynda qaıta óńdeýge jaraıtyn shıkizattardy qabyldaıtyn arnaıy qoıma jumys istep tur. Ony II toptaǵy múgedek Sergeı Prıvalov ashyp, búginde óz isin dóńgeletip otyr. Densaýlyǵyndaǵy kináratyna qaramastan Sergeı bala kúninen alǵyr bolyp ósken. Mektepti úıde oqyp júrip aıaqtaǵan soń, kolledjden baǵdarlamashy mamandyǵyn alyp shyqty. Keıin ata-anasy men dostarynyń qoldaýynyń arqasynda Derjavınsk qalasynda kishigirim qoımany jalǵa alyp, karton qaǵazdary, plastık bótelkeleri men temir ydystardy jınaıtyn oryn ashty. Qoımada otyryp qana qoımaı, qala ishin aralap shıkizat izdeýge kiristi. Jınalǵan qarajatyna velosıped satyp alyp, oǵan arnaıy jáshikter ornatty.
«Nur Otan» partııasynyń Jarqaıyń aýdandyq fılıalyna kómek surap kelgen Sergeıge partııalastar qolushyn sozyp, qajetti qujattardy jınastyryp, qoımany senimgerlik basqarýǵa alýǵa kómektesti. Qoımada búgingi kúni Sergeı allıýmınıı ydystardy, plastık, shyny bótelkeler men qaǵaz qaldyqtaryn jınaýda.
«Sergeı óz isin karton jınaýdan bastaǵan. Partııanyń kómegimen qujat jınaýǵa kómektestik. Oblys ortalyǵyna shıkizat jóneltýde qıyndyq kórip otyr. Bul másele de sheshimin tabady dep senemiz», deıdi aýdandyq partııa fılıalynyń konsýltanty, aýdan ákiminiń múgedekter máselesi boıynsha keńesshisi Ádil Nurbekov.
Búginde Sergeı «Bastaý-bıznes» baǵdarlamasyna qujattaryn tapsyryp qoıǵan. Oqyp, nesıe alyp, bıznesin keńeıtsem degen nıette.
«Qoqys óńdeıtin seh ashsam deımin. Aınalanyń barlyǵy shashylǵan qoqys. Ony qaıta óńdeýden ótkizip, qurylys zattaryn shyǵarý oıda bar», dep óz josparymen bólisken Sergeı qol qýsyryp otyrǵan jan emes. Qatarlastarynan kem qalmaı joba quryp, grant alyp, bıznesin keńeıtpekshi.
Aslan OSPANOV
Aqmola oblysy
