Aıy-kúni taıap otyrǵan ana, jańa baspanasymen quttyqtap kelgen bizben aqjarma tilegin bylaısha bólisti: «Aýylda týyp-óstim. Turmysqa shyqqan soń ata-anamyzdan bólek shyǵaıyq dep páter jaldadyq. Men Qudaıdyń bergen balalaryn baǵyp úıde otyrdym. Otaǵasy Amanǵajy jalǵyz bas kóterer, onyń tabysy kıim-keshek, tamaqtan aspady. Aýylda turǵyn úı salynbaǵandyqtan úı kezegi de jetpedi. Bıyl da aıaǵym aýyrlady. Juma kúni shelpek pisirip, as qamdap otyr edim, úıge buryn Kókpekti aýylynda ákim bolǵan Rýslan Bektasov aǵaı kelip: «Sizdi «Elim-aı – Kókpekti» basshysy keńsege kelsin dep jatyr» dedi. Barsaq, Bolat Bekberdınov aǵa: «Men sizderge úı alyp berdim. Mynaý kilti, merekeńizben quttyqtaımyn», dedi. Meniń olarǵa degen alǵysym – aman-esen bosanyp, osy balalarymdy naǵyz azamat etip tárbıeleýden bastalar. Qyzdarymdy apaıdaı, uldarymdy aǵaıdaı etip tárbıelep, el qataryna qosqym keledi».
Tórt bólmeli úıin tap-taza etip jınap qoıypty. Uldarda – Ádil, Ulan, Álınur úshin bólek bólme, qyzdar – Gúlim, Tolǵanaı, Toǵjanǵa da jyly, jaryq jaı bar eken. Qonaq bólmesi men asúıi at shaptyrym. Jyly, jaryq, terezege gúl ekken ana men balanyń qýanyshynda shek joq. Syrtqy jaı bólek sharýashylyq – monsha, garaj, jazǵy as úı, mal qora, otyn shoshalasy saqadaı saı. «Qaıtsem otbasymdy asyraımyn, balalarymdy jetkizemin, jarymdy baqytty etem» degen Amanǵajynyń jigerine jiger, qaıratyna qaırat qosyldy. Balaly úıin bazar etken aǵalaryna dán rıza.
Qaırat BESBAIYS,
jýrnalıst
Shyǵys Qazaqstan oblysy,
Kókpekti aýdany
