Bul kitaptardyń shyqqanyna bir-eki jyl bolǵanymen shalǵaıda jatqan Jangeldın aýdanyna áli jetpegen bolatyn. Sonyń jaqynda sáti tústi. Oblysqa issaparmen kelgen Mádenıet jáne sport mınıstrliginiń Til saıasaty komıtetiniń tóraǵasy Qýat Borash, Sh.Shaıahmetov atyndaǵy «Til qazyna» ulttyq ǵylymı-praktıkalyq ortalyǵy bas dırektorynyń mindetin atqarýshy Erbol Tilesh, L.Gýmılev atyndaǵy Eýrazııa Ulttyq ýnıversıtetiniń professory, fılologııa ǵylymdarynyń doktory Saǵymbaı Jumaǵulov Torǵaı qalasyna arnaıy soǵyp, mýzeıler keshenine osy ensıkloppedııalar men Alash ardaqtylary týraly basqa da kitaptardy tapsyrdy.
«Mýzeı qazir jurt tek jádigerlerdi kórip, qyzyqtaıtyn oryn ǵana emes, aýdandaǵy, jalpy Torǵaı óńiri tóńiregindegi kolledjder men mektep oqýshylary jáne Alash arystary týraly materıal izdegen ózge ǵalymdar men jýrnalıster úshin qorǵa da aınalyp kele jatyr. Jastar Alash ardaqtylary týraly materıal izdegende osy kitaptar taptyrmaıtyn dúnıeniń biri» deıdi mýzeı kesheniniń dırektory Gúlbaný Sársekeı.
Torǵaıǵa kelgen qonaqtar Ahmet Baıtursynovtyń kindik qany tamǵan Aqkólge, uly adamnyń týǵan úıine soǵýdy da josparlaǵan eken. Biraq kóktemgi qar erýine baılanysty joldyń nasharlyǵynan jarty joldan qaıtýyna týra kelipti.
«Ahmet Baıtursynov týǵan úıdi aýyldastar, Ahań urpaqtary asarlatyp kóterip qoıǵan edi. Bul bir jaǵynan kelýshiler úshin tanymdyq mańyzy kúshti, týrıster tartýǵa da, ásirese, ishki týrızmdi damytýǵa suranyp turǵan nysan ekeninde daý joq. Alaıda aýyldastar qam kesekten soqqan úı, onyń ústine qysymen ot jaǵylmaǵan soń, onyń tozýy da tez. Árıne, kelgen ǵalymdardy Ahań úıiniń ǵylymı-tanymdyq jaǵy qatty qyzyqtyrǵany sózsiz. Aldaǵy ýaqytta ol jaqqa jol da túzeledi, Ahań úıi de jóndeledi dep oılaımyz» deıdi Gúlbaný Sársekeı.
Torǵaıǵa kelgen ǵalymdar jergilikti turǵyndarmen kezdesý ótkizdi. Torǵaıdyń kimdi de rýhanı baıytatyn taǵylymdy sulý tarıhynan qyzyqty áńgimeler aıtyldy.
Názıra Járimbet,
«Egemen Qazaqstan»
Qostanaı
