Almaty oblysynyń aımaqtyq kommýnıkasııa qyzmetiniń habarlaýynsha, bıylǵy jyly Sharyn shatqaly aýmaǵynda barlyq halyqaralyq standarttarǵa saı keletin jańa mádenı-oıyn-saýyq nysanynyń qurylysy josparlanýda.
Kegen aýdanynyń ákimi Talǵat Baıedilovtyń aıtýynsha, jobanyń quny – 1,5 mlrd teńge. Qurylys jumystary úshin 24 ga jer telimi bólindi. Park qonaqtary úshin 80 m bıiktikte úsh aspaly kópir jáne 40 oryndyq qonaq úı salynatyn bolady. Joba iske qosylǵan kezde jyl saıyn orta eseppen kelýshilerge 375 mln teńgege qyzmet kórsetiledi. Sondaı-aq bıýdjet jyl saıyn 47 mln teńge salyq alatyn bolady dep josparlanýda.
О́tken jyly ǵalamtor qoldanýshylary arasynda Sharyn shatqaly týraly derek izdeýshiler sany kúrt kóbeıgen. Qazaqstannyń kórikti jerleri týraly ınternetten aqparat izdeýshilerdiń TOP-10 tiziminde Almaty oblysyndaǵy 5 birdeı nysan ataldy. Bul Google, Iаndeks jáne Youtube arnasyndaǵy izdeý derekqoryna jasalǵan monıtorıngtiń nátıjesi. Demek Sharyn shatqaly jaıly bilgisi keletin álem azamattarynyń qatary kóp degen sóz. Bıyldan bastap Sharyn alqabynda qyzý qurylys qolǵa alynbaq. Qazir shatqal aýmaǵynda «Park Canyon» seriktestigi álemdik talapqa saı keletin oıyn-saýyq parkiniń qurylysyn bastady. .Jobanyń aıaqtalý merzimi -2020 jyl. Joba boıynsha Sharynda uzyndyǵy 200 metr jáne bıiktigi 80 metrge jetetin úsh aspaly kópir salynýǵa tıis. Bul shatqaldyń quz jartasty aýmaǵyn joǵarydan tamashalap, ondaǵy tabıǵattyń tumsa bóligimen tanysýǵa múmkindik beredi.
«Bul bıýdjetke jylyna 47 mln teńge tabys ákeletin joba. Qazir qurylys jumystaryn júrgizýge shatqal aýmaǵynan 24 gektar jer telimi bólindi. Bıyl qurylystyń birinshi kezeńi aıaqtalady, oǵan 700 mln teńge jumsalady. 2020 jyly shatqaldaǵy kópirler iske qosylady dep úmittenemiz», – deıdi Almaty oblysy, Kegen aýdanynyń ákimi Talǵat Báıedilov jýrnalıstermen kezdesken kezde. .
Álemniń arǵy jarty bóliginde aty jalpaq jurtqa máshhur osyndaı bir kanon bar. Biletinder Soltústik Amerıkadaǵy Kolorado kanondarynyń týra bir úzilip túsken bólshegi osy Sharyn deıdi. Al Koloradony adamdar bertinde baıqap, jıi zertteý júrgizip, týrısterdiń nazaryn aýdarǵaly ǵasyrdan astam ýaqyt ótti. Sharyn shatqalyn alǵash kórgen orys geologtary mundaı tabıǵattyń basqa aımaqtarda joqtyǵyn aıtyp aýzynyń sýy quryǵan. Tipti Koloradońyzdyń ózi aýqymy sál úlkenirek demeseńiz, sharynnyń qyzǵylt topyraǵy, ózgeshe oıylymdyq órnekteri, tabıǵı jaqpar quzdary janynda jip ese almaıdy deıdi biletinder.
Sharyn týraly sońǵy kezderi jıi jazylyp, álemde eki-aq elde bar kanonnyń qadir-qasıeti týraly sóz bola bastady. Bul mekendi kórgisi keletin ǵalymdar da, týrıster de kóp. Memlekettik dárejede kóńil bólip, osy jerdi kórgisi keletinderdi ertip aparatyn týrıstik fırmalar da kóp. . Degenmen, Amerıkadaǵy Grand-kanon (Kolorado ańǵarlary) sııaqty múmkindikter jasalmaǵany jáne shyndyq. Eger Amerıkadaǵy sol bir oıly-shuńqyrly, tabıǵaty múldem bólek meken týraly kórgińiz kelse, aldymen ol týraly túsirilgen derekti fılmderdiń birtalaıyn aqtarasyz, barmaı turyp-aq talaı aqparatqa qanyǵyp alasyz. Zertteý eńbekter, estelikter, saıahatshylardyń kúndelikteri, sondaǵy ańyzdardyń jelisi boıynsha túsirilgen kórkem fılmderdiń ózi bir tóbe. Al Sharynǵa kúnine ary ketkende myń adamdy qabyldaýǵa bolady. Jáne bul meken týraly, qalyptasý barysy jóninde durys aqparattyń joqtyǵy qynjyltady. Tek sandyq sıfrlar ǵana bar. Derekti fılmniń ózi neken-az, onyń basym kópshiligi keshegi KSRO kezinde daıyndalǵan kınojýrnaldar.
Gúlbarshyn SABAEVA,
«Eqemen Qazaqstan»
ALMATY
