Ýkraına astanasyndaǵy oqys oqıǵa jaıly almatylyq turǵyn Mehırban Bakıeva óziniń feısbýk paraqshasynda jazdy.
«Batyrlar aramyzda júr. Kıevtegi áýejaıda kóz aldymyzda qaıǵyly jaǵdaı oryn ala jazdady. Áýejaıda kishkene qyz bala talyp, demala almaı jerge qulap qaldy. Bári onyń mańaıyna jınala qalǵan edi. Áýre-sarsańda sol jerdegilerdiń biri dárigerlerge qońyraý shalyp jatsa, ekinshisi áýejaı qyzmetkerleri shaqyrýǵa júgirip ketken edi. Al qyz balanyń jaǵdaıy tipti kúrdelene túsip, tipten demala almaı jatqan edi», - dep jazady almatylyq turǵyn.
Onyń jazýynsha, dárigerler tez kele qoımaǵan. «Kenet qyz balaǵa bir jigit júgirip kelip, em jasady. Adamdar toby bir ýaqyt únsiz qalyp edi. Kenetten qyz bala tereń dem alyp, jótele bastady. Bárimiz qýanyp, birimiz shapalaqtap, birimiz kózimizdiń jasyn súrtip jatyrmyz. Men de jyladym. Bir ýaqytta qatty úreılenip, qatty qýandyq. Jigitke jaqyndaǵanymda ol da jylap turǵanyn kórdim. Qoly dirilep tur edi», - deıdi ol.
Belgili bolǵandaı, qyz balany Shymkent qalasynyń turǵyny Alekseı Kýdıenko qutqaryp alǵan eken.
«Birshama ýaqyttan keıin oqıǵa ornyna dárigerler keldi. Qyz balanyń ómirine tónip turǵan qaýip joq bolyp shyqty. Bizdiń elimizde batyrlar turatynyn bári bilse deımin. Shymkenttikter, Sizderdiń qalalaryńyzda naǵyz batyr bar. Tanys bolsańyzdar, mindetti túrde qurmet kórsetińizder. Ol men úshin batyr. Rahmet saǵan jaqsy adam», - dep jazady Mehrıban.
