Qala basshysy Saryarqa aýdanyn aralap kórdi. Munda ol Qosshyǵululy, Aqan seri, Shaqpaq, Jalıl, Oqjetpes kóshelerinde, sondaı-aq Agrogorodok aýdanynda boldy. Baıqońyr aýdanynda Baqyt Sultanov Sýsamyr, Shıeli, Kemeńgeruly, Taıbýryl, Jańajol, Aqjol, Dosmuhameduly, Jetigen, Pýshkın kósheleriniń jáne О́ndiris turǵyn alabyndaǵy joldardyń jaǵdaıyn tekserdi. Baıqońyr aýdanyndaǵy «Kırpıchnyı» kentinde qala ákimi daýly ýchaskelerge qatysty másele kótergen Qarlyǵash Nabıýlınamen kezdesti. Túsindire ketsek, ınvestor bul ýchaske aýmaǵyndaǵy úılerdi súrýdi kózdep otyr, tıisinshe, turǵyndarǵa Ilınka kentinen baspana usynbaq. Alaıda keıbir turǵyndar bul usynystan bas tartyp, qarjylaı ótemaqy talap etýde. Aýdan ákimi Erlan Kanalımovtyń aıtýynsha, ınvestor olardyń úılerin 25-26 mln teńgege baǵalaǵan, al turǵyndardyń talaby 60 mln teńgege saıady. О́z kezeginde Baqyt Sultanov «Kırpıchnyı» turǵyndarynyń talap-tilegin tyńdap, jaǵdaıdy anyqtap, daýly máseleni sheshýge ýáde berdi. Odan keıin B.Sultanov Almaty aýdanyndaǵy Abylaıhan, Býrabaı, Qozybasy, Lepsi kóshelerinde, sondaı-aq Esil aýdanyndaǵy A.Ermekov, Alpamys batyr, Temirqazyq, Kosmonavttar kósheleri men turǵyn alaptarynda, sondaı-aq Prıgorodnyı turǵyn alabyndaǵy Belasar, Arnasaı kóshelerinde boldy. Sonymen qatar, ol Momyshuly kóshesindegi joldardyń jaı-kúıin tekserdi.
«Turǵyndar úshin qolaıly jaǵdaıdy qamtamasyz etý kerek. Tazalyq ornatyp, jaryqtandyrý júrgizý óz aldyna, sondaı-aq kúrmeýi qıyn sýmen jabdyqtaý máselesin jedel túrde sheshý kerek. Aýdan ákimderiniń jumysynda olqylyqtar bar, sondyqtan turǵyndar aıtqan máselelerdi baqylaýǵa alýdy tapsyramyn», – dep qorytyndylady B.Sultanov.
