Máselen, Shet aýdanyndaǵy Qyzylqoı aýylynda toǵyz úıdiń aýlasyna sý kirgen. Bul jerden 16 adam kóshirilip, týystarynyń úıine ornalastyryldy. Qazir sol mańnan aǵyp ótetin Taldy ózeniniń ańǵary bekitilýde.
Jańaarqa aýdanynda tórt birdeı joldyń ústinen qyzyl sý júrip ótken. «Qyzylorda-Pavlodar» trassasynyń 771-shi shaqyrymynda joldyń ústimen aǵyp jatqan sýdyń eni 40-60 metr, tereńdigi 10-15 sm bolady. Bul jerdegi sý ótkizgish eki qubyr tolyq qýatymen jumys istep tur.
Sonymen qatar, Nura, Qarqaraly jáne Abaı aýdanyndarynda da qarǵyn sý jergilikti jáne respýblıkalyq mańyzdaǵy joldardyń oıpańdaý tustaryn basyp aǵa bastady. Bul jerlerde «Qazaqavtojol» JShS-niń qyzmetkerleri kúni-túni kezekshilik etip júr.
Búgingi kúnde oblys boıynsha eldi mekenderdiń oıpań jerlerde ornalasqan kóshelerin sý almaýy úshin qorǵanys úıindisin nyǵaıtý jumystar júrgizilip jatyr. Bul sharýalarǵa TJ-nyń jeke quramy men arnaıy tehnıkalar jumyldyrylǵan.
«Qazirgi ýaqytta Sherýbaı-Nura, Samarqan jáne Yntymaq sý qoımalarynda sý aǵyzý mólsheri arttyryldy. Jaǵdaı sý tasqynyna qarsy shtabtyń udaıy baqylaýynda», degen aqparat taratty oblystyq tótenshe jaǵdaılar jónindegi departamenttiń baspasóz qyzmeti.
Qaraǵandy oblysy
