Atyraý oblysy ákiminiń birinshi orynbasary Serik Shapkenov qoǵam ókilderimen birge mektep-ınternattaǵy balalardyń jaǵdaılaryn tekserdi. О́ńirlik kommýnıkasııalar qyzmeti habarlaǵandaı, komıssııa músheleri balalardyń palatalaryn qarap, oqý-ádistemelik bazamen, ashana men medbólimsheniń jaǵdaıymen tanysqan.
Komıssııa músheleri tárbıeshiler tarapynan durys baqylaýdyń joqtyǵyna, balalar jatqan palatalardyń sanıtarlyq normalarǵa saı emestigine kóz jetkizgen.
Mekeme dırektory Rymbek Turdaǵalıdyń aıtýynsha, ol bul laýazymǵa ótken jyly kelgen.
-Jaýapkershilikten jaltarýǵa bul sebep emes. Jumyspen qamtýdy úılestirý jáne áleýmettik baǵdarlamalar basqarmasynyń basshysy eki aı buryn taǵaıyndaldy, men de osy salaǵa jaqynnan beri jetekshilik etemin, biraq bul bizden de, osy salaǵa birneshe jyldan beri jetekshilik jasap otyrǵan adamdardan da jaýapkershilikti alyp tastamaıdy. Barlyǵyna shara qoldanylady, erekshe balalarǵa tikeleı jaýapty basqarma basshysynyń orynbasaryna sógis jarııalandy, munymen de aıaqtalmaıdy, qyzmettik tekserý qortyndysymen barlyq jaýapty tulǵalarǵa qatysty sheshim qabyldanady, -dedi Shapkenov. -Biz jaǵdaıdy jurtshylyqtyń ashyq baqylaýyna shyǵaramyz - ÚEU ókilderi ár ınternatty qarap, bizdiń jumysymyzǵa baqylaý jasaıdy. Sizderdiń ótken jyly laýazymǵa taǵaıyndalyp, biraq eshqandaı shara qoldanbaǵandaryńyz bárin óz betimen jibergenderińizdi kórsetedi.
Dırektordyń kabınetinde beıne baqylaý kamerasy bar, sol arqyly balalarǵa qol kóterý derekteri anyqtalǵan. Jaǵdaıdy mekeme qyzmetkerleri emes, prokýratýra anyqtady.
-Sizdiń kabınette otyryp, qyzmetkerlerińizdiń balalarmen qandaı qarym-qatynasta ekenin qaraýǵa murshańyz bolmady,-dedi Serik Shapkenov. -Tipti sizdiń ózińizge jasap otyrǵan jaǵdaıyńyz ben balalardyń halin salystyrý arqyly kóp nársege kóz jetkizýge bolady. Eger balalar sizdiń jumys ornyńyzdyń jaǵdaıyndaı jerde ómir súrse, bári basqasha bolar edi. Bul-jaýapsyzdyq.
Oblysta komıssııa quryldy, quramynda bilim berý, halyqty áleýmettik qoldaý, qoǵamdyq densaýlyq saqtaý, densaýlyq saqtaý salalarynyń ókilderi, qarjy aýdıtorlary men qoǵam ókilderi bar. Komıssııaǵa múmkindigi shekteýli, psıhonevrologııalyq aýytqýy bar adamdar turatyn mekemelerdi kez kelgen ýaqytta tekserýge quqyq berilgen. Komıssııa jumysynyń qortyndysy boıynsha jaǵdaıdy jaqsartýǵa usynystar beriledi.
Atyraý oblysy ákiminiń birinshi orynbasary barlyq kabınetterge ınternetke qosylǵan veb-kamera ornatýǵa tapsyrma berdi, sol arqyly ata-analar, komıssııa músheleri men tekserýshi organdar balalardyń jaǵdaıyn táýlik boıy baqylaı alady.
Atyraý
