Qazir óńirde halyqtyń az qamtylǵan bólikterin qoldaýǵa qatysty qolǵa alynǵan is-sharalar kesheni turaqty ári júıeli syıpat alyp keledi. Bul oraıda basty baǵdarlamalyq baǵyt Nur Otan partııasynyń XVIII sezinde QR-nyń Tuńǵysh Prezıdenti, Elbasy Nursultan Nazarbaev qoıǵan mindetterden tamyr tartady. Soǵan sáıkes oblysta ataýly áleýmettik kómek pen materıaldyq qoldaýǵa asa muqtaj jandardy neǵurlym kóbirek qamtý kózdelgen.
Buǵan deıin BAQ-ta habarlanǵanyndaı bıyl ataýly áleýmettik kómek berý tártibine birqatar ózgerister engizilgeni málim. Ony oqyrmandar nazaryna taǵy bir sala ketsek: Buryn ataýly áleýmettik kómek taǵaıyndaý úshin esepke alynatyn tómengi kúnkóris deńgeıindegi ólshem 14 849 teńge bolsa, endi onyń mólsheri 20 789 teńge quraıdy. Sonymen qatar azamattardyń ótinish-tilekterine oraı otbasyndaǵy jıyntyq tabysty eseptegende, altyn jáne kúmis alqaly jáne kóp balaly analarǵa tólenetin járdemaqylar, sondaı-aq stýdentterdiń shákirtaqysy eseptelmeıtin boldy.
Osy oraıda oblysta ataýly áleýmettik kómek tóleý úshin asa muqtaj otbasylarǵa bıylǵy 2019 jyly 3,5 mıllıard teńge kóleminde qarajat jumsaý qarastyrylǵan. Bul jóninde gazet tilishisine Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Qaırat Otarov aıtyp berdi. Onyń málimdeýinshe qazirgi kúni oblysta az qamtylǵan jáne kóp balaly otbasylardyń áleýmettik kartasy jasaqtalý ústinde. Onyń aýmaǵy men astary meılinshe keń. Mundaǵy basty maqsat ataýly áleýmettik kómekti ońdy-soldy úılestirip, masyldyq kóńil-kúıdiń shoǵyn qozdyrý emes, kerisinshe eńbekpen qamtý aıasyn barynsha keńeıtý.
Bul úshin oblysta óz isi men kásibin bastaýǵa bel býǵandarǵa shaǵyn nesıeler berýge baǵyttalǵan aýqymdy jumystar júrgizilýde. О́ńirde qazirgi qalyptasqan áleýmettik ahýaldy aıqyndap ony oń jolǵa qoıý isinde ótken aqpan jáne naýryz aılarynda ótkizilgen «Ashyq esik kúnderi» jaqsy nátıjeler bergenin aıtýǵa tıispiz. Osy shyraıly shara sheńberinde ókiletti organ ókilderine ár túrli kómekter men keńester surap kelgen azamattardyń jalpy sany 5 200-den asyp túsken eken. Olardyń talap-tilekteriniń bir de biriniń eleýsiz ári eskerýsiz qalmaǵanynyń ózi bir mereı.
Osy tusta atap óterlik jáıt turǵyndar tarapynan eń jıi qozǵalǵan másele – baspana bolypty. Buǵan baılanysty ne deýge bolady? Aqtóbe oblystyq memlekettik sáýlet-qurylys basqarmasynyń basshysy Nurlan Imanalınnyń aıtýynsha aımaqta aldaǵy kezde tabysy tómen kóp balaly otbasylarǵa jyldyq ósimi eki paıyzdan aspaıtyn qoljetimdi páterler alý múmkindigi jasalmaq.
Oblys ortalyǵynda bul baǵyttaǵy arnaýly qurylys jumystaryn «NurAqtóbe» jańa turǵyn úı aýmaǵynan bastaý jóninde sheshim alynǵan. Tabysy az, turmys deńgeıi tómen otbasylar men muqtaj jandardyń kópshiligi kóp jaǵdaılarda alǵashqy jarnany tóleýdiń ózine qınalyp qalýy ábden múmkin. О́ńirde máseleniń bul jaǵy da eskerilgen. Sóıtip azamattardyń mundaı syıpattaǵy toptaryna turǵyn úı sertıfıkattaryn berý kózdelgen. Bul úshin oblystyq bıýdjetten eki júz mıllıon teńge qarajat bólingen.
Mine, óńirde qolǵa alynǵan, halyqty áleýmettik turǵydan qoldaý sharalarynyń keıbir mysaldary osyndaı.
AQTО́BE
