Aqparatqa súıensek, apatta qaza bolǵan 13 áskerı qyzmetshiniń 8-i Almaty oblysynyń týmasy. Aldymen Qazaqstan Respýblıkasynyń Qorǵanys mınıstri, general-maıor Nurlan Ermekbaev sóz alyp, marqumdardyń otbasy men jaqyn týystaryna kóńil aıtty.
- Elbasymyz Nursultan Nazarbaevtyń jáne Qazaqstan Prezıdenti Qasym-Jomart Toqaevtyń tapsyrmalary boıynsha qaza tapqan áskerı qyzmetshilerdiń otbasylaryna zańnamada belgilengen barlyq kepildi kómekter kórsetiletin bolady. Basqa da moraldyq-materıaldyq, psıhologııalyq qoldaýlar jasalady. Bul kómek bir jolǵy kómek bolmaýy kerek. Men garnızondar bastyqtaryna qazaq tapqan jaýyngerlerdiń otbasylaryn qamqorlyqqa alyp, olardyń balalaryn oqytý, áleýmettik máselelerin sheshý sharalaryn atqarýdy tapsyramyn. Qaza bolǵandardy máńgi este saqtaý úshin memorıal turǵyzý josparlanýda. Qyzmettesterimiz óz áskerı boryshyn adal oryndaǵanyn eskere otyryp, olar memlekettik nagradalarǵa usynylatyn bolady, - dedi N. Ermekbaev. Sonymen qatar jetisýlyq tórt azamattyń denesi tıisti medısınalyq saraptamadan ótkizilý ústinde ekenin de atap ótti.
Oblys ákimi Amandyq Batalov ta aýyr qaıǵyny bólisip, marqum jaýyngerlerdiń otbasylaryna barynsha kómek kórsetiletinin aıtty:
- «Qaıǵyny bólisseń, azaıady» deıdi halqymyz. Bul qaıǵyly oqıǵa bárimizge de aýyr tıdi. Qansha kómek kórsetkenimizben, qaıǵyny bólisip kóńil aıtqanymyzben, azamattardy qaıtara almaımyz. Bolǵan iske bolattaı bekem bolyńyzdar. Bizdiń inilerimiz ózderiniń boryshtaryn eldiń aldynda, Otannyń aldynda adal ótedi. Men óz tarapymnan, Almaty oblysynyń jurtshylyǵy atynan topyraqtary torqa, jandary jannatta bolsyn deımin. Batyr uldarymyzdyń attaryn máńgige saqtap, urpaqqa úlgi etemiz. Artynda qalǵan balalaryna qamqorlyq jasap, árqashan kómek kórsetý – bizdiń paryzymyz, - dedi A. Batalov.
Munan soń Qazaqstan Musylmandary Dinı basqarmasynyń tóraǵasy, Bas múftı Serikbaı qajy Oraz, Almaty oblysy Qarýly Kúshteri ardagerler keńesiniń basshysy Rahym Qırgabakov sóz alyp, azamattardyń Táýelsiz eldiń tynyshtyǵyn kúzetý jolynda kóz jumǵanyn atap ótti. «Qaharman jaýyngerlerdiń esimi jadymyzda máńgi saqtalady» dedi óz sózderinde.
Mıtıngide jaýyngerlerdi eske alyp, olardyń qurmetine aspanǵa ot atylyp, gúl shoqtary qoıyldy.
Búgin Taldyqorǵanmen qatar elimizdiń birqatar óńirinde jaýyngerlermen qoshtasý mıtıngileri ótti. Sonyń ishinde Talǵar, Kerbulaq aýdandarynda da ótip, jurtshylyq maıor Tımýr Qudaıberdıev pen leıtenant Aslan Aıtbaevty sońǵy sapraǵa shyǵaryp saldy. Al ózge tórt marqumnyń denesi tıisti saraptamadan ótý ústinde. Saraptama aıaqtalǵannan keıin, ol jaýyngerlerge arnap osyndaı rásimder atqarylatyn bolady.
Atap ótsek, Almaty oblysynyń ákimdigi áskerı jattyǵý kezinde qaza bolǵan jetisýlyq azamattardyń otbasylaryna 1 mln. teńgeden kómek kórsetetin bolady. Sonymen qatar jerleý rásimderin atqarýdy kóterip almaq.
