«Mı-8 - 1988 shyǵarylǵan tikushaq. Almaty qalasyndaǵy №405 avıajóndeý zaýytynda kúrdeli jóndeýden ótken. Zaýyttan shyqqannan keıin tikushaqqa áýede 2000 saǵat nemese 8 jyl ushý resýrsy beriledi. Búginge deıin tikushaq áýede 773 saǵat ushqan», dedi Áskerı-áýe kúshteriniń qolbasshysy Dáýren Qosanov.
Onyń aıtýynsha, tehnıkalyq turǵyda tikushaqta eshqandaı aqaý bolmaǵan. Memlekettik komıssııa tergeý júrgizip jatqandyqtan, Mı-8 tıpti tikushaqtardyń ushýy toqtatyldy.
«Apta boıy olar tehnıkalyq tekseristen ótedi. Mı-8 - postkeńestik elderdiń ishinde ǵana emes, búkil álemdegi eń adam kóp sııaqtyn tikushaq sanalady. Eń qarapaıym ári senimdi tikushaq. Qazirgi tańda biz Mı-17 jáne Mı-171 tikushaqtaryn, sonymen birge Mı-35 jaýyngerlik tikushaqtaryn satyp alýdamyz. Josparly jumystar júrýde», dedi D.Qosanov.
Ol sondaı-aq memlekettik komıssııa tergeý amaldaryn júrgizip jatqanyn atap ótti.
«Nátıjesi resmı túrde habarlanady. Barlyq sebepter saralanýda: tehnıkanyń istemeı qalýy, adamı faktor jáne meteojaǵdaı. Men komıssııa múshesi emespin. Sol sebepti, ol jaıynda pikir bildirýge qaqym joq. Qara jáshik memlekettik komıssııada. Ony tekserý quqyǵy bizde joq», dedi Dáýren Qosanov.
Sonymen qatar, Dáýren Qosanovtyń aıtýyna qaraǵanda, QR zańyna sáıkes, kóz jumǵan áskerı qyzmetshilerdiń otbasyna bir jolǵy ótemaqy beriledi. Bul - onyń 5 jyldyq jumysy boıynsha jalaqysy. Sonymen birge, otbasylar qyzmettik baspanany qaıtarymsyz zańdastyryp alýǵa quqyly. Jerleý rásimi boıynsha barlyq shyǵyndar óteledi. Sondaı-aq, otbasynda qansha adamnyń bolýyna baılanysty baspanaǵa qatysty ótemaqy tólenedi. Bul adam basyna qaraı ár áskerı qyzmetshiniń otbasyna ártúrli ótemaqy berilmek.
Eske salaıyq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyraǵan bolatyn.
