Qaraǵandy oblysynyń ákimi Erlan Qoshanov oqıǵa ornyna baryp, jaǵdaıdy óz kózimen kórip qaıtty. Qazirgi tańda basty mindet - úılerdi sý basýdan saqtap, turǵyndardy qorǵaý úshin barlyq sharalardy qoldaný bolyp tabylady.
2017 jyly Buqar Jyraý aýdanynda Chkalovo jáne Sadovoe kentteriniń aınalasynda uzyndyǵy 2-3,5 shaqyrymdy quraıtyn qorǵanys dýaldary salyndy.
- Biz bul sharalardyń oń nátıje bergenin kórip otyrmyz. Sýdyń kóp kelýine qaramastan, jaǵdaı baqylaýda ustalyp otyr. Úılerdi sý basqan joq. Ázirge turǵyndardy kóshirýge esh negiz joq, - dedi Erlan Qoshanov. - Búgin sý tasqynynyń qarqyndy kezeńi endi ǵana bastaldy. Aldaǵy bir-eki kúnde budan da kóbirek sý kelýi múmkin. Biz Samarqand sý qoımasy boıynsha durys sheshim qabyldaýǵa tıispiz. Qajet bolǵan jaǵdaıda sý aǵyzý ulǵaıtylady, ol úshin rezerv bar.
Sadovoe aýylynda úzdiksiz sý sorǵylaý jumystary men qorǵanys úıindilerin nyǵaıtý jalǵastyrylýda. Oqıǵa ornynda oblystyq sý tasqynyna qarsy shtabtyń jyljymaly pýnkti ornalasqan. Eldi mekenge azamattyq qorǵanys jáne jergilikti atqarýshy bıliktiń barlyq kúshteri jumyldyrylǵan.
Oblystyq TJD bastyǵy Ibragım Kúlshimbaev baıandaǵandaı, Sadovoe aýylynda aldyn alý sharalaryn qamtamasyz etýge jeke quramnyń 140 adamy, 35 birlik arnaıy tehnıka: júk tıegishter, samosvaldar, jol talǵamaıtyn kólikter, vahtovkalar, motopompalar jáne t. b. jumyldyrylǵan.
Kentte 40-tan astam úı bar, onda 350-ge jýyq adam turady. Oblys aýmaqtarynyń basym bóliginde qar erip boldy. Degenmen Samarqand, Sherýbaı-Nura jáne Yntymaq sý qoımalarynan sý aǵyzý jumystary erekshe baqylaýda ustalyp otyr.
TJD aqparaty boıynsha, Osakarov, Nura jáne Buqar Jyraý aýdandarynyń ózenderinde 8 muz jarý sharalary ótkizilgen. Erigen qar sýyn burý jáne eldi mekenderdi qorǵaý úshin 3700 metr qorǵaý úıindileri turǵyzyldy jáne nyǵaıtyldy, 3100 metr aınalma arnalar quryldy, 24820 dana qaptar tóseldi, 57 myń tekshe metrden astam sý soryldy, 950 tonna ınertti materıal paıdalanyldy.
