О́z sóziniń basynda Eljan Birtanov, QR Tuńǵysh Prezıdenti – Elbasymyzdyń 2018 jylǵy 5 qazandaǵy Joldaýyn iske asyrý maqsatynda Densaýlyq saqtaý mınıstrligi Alǵashqy medısınalyq–sanıtarııalyq kómekti damytýdyń negizgi baǵyttaryn iske asyrýdyń 2019–2020 jyldarǵa arnalǵan is-sharalar josparyn bekitilgeni týraly atap ótti.
Dárigerlerdiń júktemesin tómendetý maqsatynda 2018 jyly 1315 jalpy praktıka dárigeriniń ýchaskesi men 79 pedıatrııalyq ýchaske ashyldy jáne 1 dárigerdiń júktemesi 1989 tirkelgen adamdy qurady.
2019 jyly elimizdiń medısınalyq joǵary oqý oryndaryndaǵy 5 000-nan astam túlektiń 1515-i jalpy praktıka dárigeri mamany bolady. Bul alǵashqy medısınalyq kómek kadrlarynyń tapshylyǵyn túgeldeı qamtýǵa jetkilikti. Bıyldan bastap túlekter memlekettik densaýlyq saqtaý uıymdarynda mindetti túrde úsh jyldyq jumystaryn óteıtin bolady.
AMSK qoljetimdiligin qamtamasyz etý úshin uıymdardy irilendirý jumystary júrgizilýde. Sońǵy eki jylda 214 jańa obekt paıdalanýǵa berildi, onyń 31%-y jeke ınvestısııa qarajatynan salyndy. Aldaǵy úsh jylda 120 mlrd teńgeden astam somaǵa jańa 595 AMSK obektisin ashý josparlanǵan. Bul rette, obektilerdiń jartysynan astamyn memlekettik-jekemenshik áriptestik sheńberinde ashý josparlanyp otyr. Sonymen qatar 228 AMSK obekti kúrdeli jóndeýmen, 11000-nan astam medısınalyq tehnıkamen qamtamasyz etiledi.
QR Densaýlyq saqtaý mınıstriniń aıtýynsha jobalyq-smetalyq qujattamany ázirleý prosesin jáne olardyń memlekettik saraptamasyn ońtaılandyrý úshin Densaýlyq saqtaý mınıstrligi AMSK obektileriniń úlgilik jobalaryn ázirledi. Budan ózge, keıbir óńirlerde AMSK obektileriniń daıyn derbes jobalary bar, olardy Qazaqstannyń basqa óńirlerinde paıdalanýǵa bolady. Osylaısha, AMSK obektilerin salýǵa barlyq qajetti jaǵdaı jasalynǵan.
«Densaýlyq» memlekettik baǵdarlamasy aıasynda negizgi sozylmaly aýrýlardy basqarý baǵdarlamasy keńeıtilýde.
Elbasynyń tapsyrmasy boıynsha, aýrýlardy basqarý baǵdarlamasyn engizgen mamandardy yntalandyrý maqsatynda 2019 jyldyń basynan 36 000 ýchaskelik medısına qyzmetkerleriniń jalaqysyn kezeń-kezeńmen 20%-ǵa ulǵaıtý josparlanyp, 5,3 mlrd teńge kózdeldi.
Buǵan qosa, mınıstr AMSK tolyqtaı sıfrlandyrý prosesine toqtalyp ótti.
«2018 jyldyń qorytyndysy boıynsha Qazaqstan Respýblıkasy boıynsha densaýlyq saqtaý uıymdaryn kompıýterlik tehnıkamen jabdyqtaý 95,1% qurady, qalalar men aýdan ortalyqtarynda ınternet jelisi men medısınalyq aqparattyq júıeni engizý 100% qurady», — dedi mınıstr.
Densaýlyq saqtaý uıymdarynyń 99%-nda medısınalyq qujatty qaǵazsyz júrgizý engizildi, 2 mln-nan astam adam emdelýshilerge arnalǵan mobıldik qosymshany qoldanýda. Sıfrlandyrýdyń nátıjesinde emhanalarǵa kelý 2 esege, kezekter sany 60%-ǵa qysqardy.
Eljan Birtanov óz sózin qorytyndylaı kele, Densaýlyq saqtaý mınıstrligi AMSK qoljetimdiligi men sapasyn jaqsartý jumystaryn turaqty negizde júrgizetinin atap ótti.
