Depýtattar tarapynan qoldaý tapqan zań jobalarynyń ishinde «Kaspıı teńizinde tosyn oqıǵalardy bolǵyzbaý týraly kelisimdi ratıfıkasııalaý týraly» zań jobasy bar.
Kelisim Ázerbaıdjan, Iran, Qazaqstan men Reseı jáne Túrikmenstan memlketteriniń qarýly kúshteriniń áskerı korablderiniń Kaspıı teńizinde júzýi men áýe kemeleriniń ushýy qaýipsizdigin qamtamasyz etýge baǵyttalǵan.
Sondaı-aq, Kelisim Taraptardyń Kaspıı teńizinde, aýmaqtyq sýlardan jáne onyń áýe keńestiginen tys áreket etetin áskerı korablderi men áýe kemelerine qoldanylatyn bolady.
Taraptardyń áskerı korablderi jáne áskerı korablderiniń toptary sýasty kabelderi men qubyrjoldarynyń trassalary ótetin, sondaı-aq jasandy araldar, qondyrǵylar, qurylystar ornalasqan aýdandarda osy obektilerge jáne olardyń qyzmetine qater tóndiretin kez kelgen is-qımyldardan tartynýy kerek.
Jalpy otyrys barysynda Májilis Qazaqstan men Reseı arasyndaǵy áskerı maqsattaǵy ónimdi paıdalanýdy baqylaý týraly kelisimdi maquldady.
2017 jylǵy 29 qarashada Máskeýde jasalǵan bul Kelisimge sáıkes Shart sheńberinde áskerı maqsattaǵy ónimdi berýshi Tarap onyń bolýyn jáne nysanaly paıdalanylýyn baqylaýdy júzege asyrýǵa quqyly, al ózine áskerı maqsattaǵy ónim beriletin Tarap ónim berýshi Taraptyń baqylaýdy júzege asyrýy úshin qajetti jaǵdaılar usynady.
Kelisimge sáıkes ónim berýshi Tarap ókilderiniń Shart sheńberinde jasalǵan kelisimsharttar boıynsha beriletin áskerı maqsattaǵy ónimdi esepten shyǵarý, joıý (kádege jaratý) kezinde qatysýǵa quqyǵy bar.
Jalpy otyrys sońynda halyq qalaýlylary ortalyq memlekettik atqarýshy organdardyń basshylaryna birneshe depýtattyq saýal joldady. Olar Z. Amanjolova, J. Ahmetbekov, D. Espaeva, A. Perýashev, N. Mıkaelıan, Sh. Hahazov.
