Rýhanııat • 04 Sáýir, 2019

Ortalyq Azııa talanttardy izdeıdi

Eń sátti televızııalyq format retinde Gınnestiń rekordtar kitabyna engen Got Talent shoýy endi Ortalyq Azııa elderiniń qatysýymen ótpek. «Central Asia’s Got Talent» (Ortalyq Azııa talanttardy izdeıdi) televızııalyq jobasyna irikteý bastaldy. Talanttar shoýyna qatysamyn deýshilerge qandaı da bir shekteý joq, eńkeıgen káriden estııar balaǵa deıin baq synaı alady.

Aıa О́MIRTAI

Baspasóz máslıhatyna «Habar» Agenttigi» AQ basqarma tóraǵasynyń birinshi orynbasary – Rınat Kertaev, «Central Asia’s Got Talent» shoýynyń bas prodıýseri – Serik Akıshev (Qazaqstan), Zoʻr TV telearnasynyń prodıýseri – Tımýr Alıev (О́zbekstan), «Telemedıa» kompanııasynyń bas dırektory – Alekseı Sıdorov (Qyrǵyzstan), «TV Safına» telearnasynyń halyqaralyq baılanys bóliminiń basshysy – Nargıs Kasymova (Tájikstan) qatysty. Atalǵan joba aıasynda Qazaqstan, О́zbekstan, Qyrǵyzstan jáne Tájikstan elderi arasynda áriptestik baılanys ornatý jaıly memorandýmǵa qol qoıyldy. Tórt memlekettiń ókilderi – Rınat Kertaev, Serik Akıshev, Tımýr Alıev, Qanatbek Qultaev, Nargıs Kasymova altyn tetikti basyp, jobanyń alǵashqy kezeńi – irikteýdiń bastalǵanyn málimdedi. Bul jobanyń resmı túrde iske qosylǵanyn bildiredi.

«Qazaqstandyq televızııa salasynda alǵash ret barlyq talantty adamdardy bir alańǵa jınamaqpyz. Otandyq arnalarda buǵan deıin án, bı, sport jáne óner báıgeleri ótken bolatyn. Al bul baıqaýda kez kelgen daryndy adam óziniń múmkindigin synap kóredi. Sondaı-aq jobanyń taǵy bir ereksheligi, Ortalyq Azııa elderine ortaq shoý bolady, ıaǵnı baǵdarlamaǵa qazaqstandyqtarmen birge О́zbekstan, Qyrǵyzstan jáne Tájikstan memleketteriniń azamattary da qatysa alady. Bizdiń basty maqsatymyz – ónerli adamdardy izdep, olardyń búkil Ortalyq Azııa memleketterine tanylýyna múmkindik berý» deıdi «Habar» Agenttigi» AQ basqarma tóraǵasynyń birinshi orynbasary Rınat Kertaev.

Central Asia’s Got Talent – Qazaqstan, О́zbekstan, Qyrǵyzstan jáne Tájikstan elderiniń azamattaryna arnalǵan talanttar shoýy. Joba irikteý, ashyq tyńdalym, shırek fınal, jartylaı fınal jáne aqtyq fınal syndy bes kezeńnen turady. Birinshi kezeńde jobaǵa qatysýshylardyń ótinishteri qabyldanyp, ári qaraı tórt elde irikteý kezeńi ótkiziledi. Baıqaýdyń júlde qory 24 mıllıon teńge, osyǵan sáıkes jeńimpazdarǵa beriletin aqshalaı syılyq ta qomaqty bolmaq. Shoý tórt eldiń «Habar», «Zoʻr TV», «Qoǵamdyq birinshi arna» jáne «TV Safına» telearnalarynan kórsetiledi.

Jobaǵa qatysýǵa nıet bildirgen Ortalyq Azııa elderiniń azamattary +7 700 600 24 24 ortaq nómirine habarlama joldaý, sondaı-aq áleýmettik jelilerdegi jobanyń resmı paraqshalaryna hat jazyp, ótinish bildirý arqyly uıymdastyrýshylarmen habarlasa alady. Sonymen qatar irikteý toby off-laın rejimde de jumys isteıdi. Uıymdastyrýshylardyń aıtýynsha, Central Asia’s Got Talent shoýynyń tusaýkeseri bıyl qyrkúıek aıynda ótedi. Al aqtyq fınal 2019 jyldyń jeltoqsan aıyna josparlanyp otyr.

Aıta keteıik, Got Talent – Fremantle brıtandyq kompanııasynyń formaty. 2006 jyly bul telebaıqaý «America’s Got Talent» degen ataýmen AQSh-ta jaryq kórdi. Halyqaralyq sıpat alǵan baǵdarlama 2014 jyly álemdegi eń sátti televızııalyq format retinde Gınnestiń rekordtar kitabyna engen.