2019 jylǵy 1 qańtardaǵy jaǵdaı boıynsha Qazaqstan Respýblıkasynyń syrtqy boryshy 158,8 mlrd AQSh dollary nemese IJО́-ge qatynasy 93,1% (jyl basynan bastap 9,5%-ǵa jaqsardy) qurady.
Syrtqy borysh qurylymynda 63,6%-yn burynǵysynsha fırmaaralyq bereshek, 25,0% baılanysty emes kredıtorlar aldyndaǵy «Basqa sektorlardyń» syrtqy boryshy, 7,8% memlekettik syrtqy borysh (Úkimet pen Ulttyq Bank), 3,6% - «Bankter» sektorynyń syrtqy mindettemeleri (EDB jáne «Qazaqstannyń Damý Banki» AQ) alyp otyr.
2018 jylǵy 4-toqsanda ekonomıkanyń banktik emes sektory mindettemeleriniń azaıýy esebinen eldiń syrtqy boryshy 2,5 mlrd AQSh dollaryna qysqardy.
Memlekettik syrtqy boryshtyń jalpy somasy 1,05 mlrd eýrony quraıtyn 5 jáne 10 jyldyq táýelsiz eýrooblıgasııalardyń eki transhyn shyǵarý esebinen 899,1 mln AQSh dollaryna ósti.
«Bankterdiń» syrtqy mindettemeleri toqsan ishinde ózgermedi, sebebi beırezıdentterdiń qolyndaǵy eýrooblıgasııalar kóleminiń azaıýy olardyń qazaqstandyq bankterdegi depozıtteriniń ósýimen óteldi.
«Basqa sektorlardyń» úlestes emes kredıtorlar aldyndaǵy syrtqy boryshy 1,6 mlrd AQSh dollaryna azaıdy, ol, negizinen, qaryzdardy óteý esebinen, onyń ishinde ERG toby kásiporyndarynyń mindettemelerin qaıta qarjylandyrý (963 mln AQSh dollaryna azaıý), «QazMunaıGaz» UK» AQ-tyń «Sberbank Rossıı» PAO aldyndaǵy (371 mln AQSh doll.) jáne «Qaztemirtrans» AQ-tyń EQDB aldyndaǵy qaryzdaryn óteý esebinen oryn aldy.
Fırmaaralyq bereshek iri ken óndirýshi jáne kóliktik kompanııalardyń sheteldik tel uıymdardan tartylǵan nesıeni óteýi nátıjesinde 1,8 mlrd AQSh dollaryna qysqardy.
Taldamalyq maqsatta syrtqy borysh qurylymynda esepti kezeńde 1,2 mlrd AQSh dollaryna azaıyp, 2019 jylǵy 1 qańtarda 22,8 mlrd AQSh dollaryn qurǵan memleket baqylaıtyn uıymdardyń syrtqy boryshy (memlekettik sektor kapıtalyna 50%-dan astam tikeleı nemese janama qatysatyn bankter men uıymdar) jeke kórinedi.
Qazaqstan Respýblıkasynyń taza syrtqy boryshy 2018 jylǵy 4-toqsanda 560,5 mln AQSh dollaryna azaıyp, 47,2 mlrd AQSh dollaryn qurady. Bul rette memlekettik sektor jáne «Bankter» qalǵan álemge qatysty taza kredıtorlar bolyp, al «Basqa sektorlar» taza qaryz alýshylar bolyp tabylady.
