Ákimdiktiń elektrondy «Open Almaty» qoǵamdyq qabyldaýynda jańa fýnksııalar paıda bolady, onlaın-qyzmet alý úshin barlyq qalalyq servıster biriktiriledi jáne aýdan turǵyndary «Ashyq bıýdjet» fýnksııasy arqyly bıýdjet qarjysynyń bir bóligin qalaı jumsaýǵa bolatyndyǵy týraly óz usynystaryn aıtyp, daýys bere alady. Bulardan ózge, qalanyń vıdeobaqylaý kameralarynyń ıntegrasııasy jáne kommýnaldy kóliktiń GPS trekıngi boıynsha monıtorıng júrgizýdiń biryńǵaı júıesi jasalady.
«Memleket basshysy jaqynda ákimdermen ótkizgen keńeste turǵyndarmen keri baılanys aıasyn keńeıtýdi tapsyrǵan edi. Biz sol mindetti oryndaýdy júıeli túrde qolǵa aldyq, áleýmettik jelilerdegi akkaýnttar men «Open Almaty» qoǵamdyq qabyldaýynan ózge biz turǵyndarmen tikeleı jumys isteıtin Biryńǵaı baılanys-ortalyǵyn quramyz. Endi qala turǵyndary túrli nómirlerdi izdemeıdi, bir nómir arqyly apatty qyzmetten bastap, anyqtamalyq sıpaty aqparattarǵa qol jetkize alady», dep atap ótti Baýyrjan Baıbek.
Aıta keterligi, jergilikti atqarýshy organdardyń ashyqtyǵyn arttyrý jáne túrli ómirlik jaǵdaılar kezinde qalalyqtarǵa kómek kórsetý maqsatynda 2017 jyly ákimdiktiń «Open Almaty» qoǵamdyq qabyldaýy ashylǵan edi. Oǵan júgingen árbir adam tıisti keńes alyp, ákimdiktiń, qala basqarmalarynyń, prokýratýranyń, polısııanyń kiris departamentiniń jáne basqalarynyń atyna óz ótinishin qaldyryp otyrdy. Portaldan qala qyzmetteriniń joldardy, aryqtardy, jylý jelileri men aýlalardy jóndeý jónindegi josparlaryn kórýge bolady. Qazirgi kezde «Open Almaty» arqyly qala turǵyndarynan 109 myńnan astam ótinish túsken, olardyń 88%-y birneshe kún ishinde oń sheshimderin tapty.
Bulardan ózge, Almaty ákimdiginiń barlyq áleýmettik jelilerde resmı akkaýntary bar. Tek Instagram paraqshasyna 200 myńǵa jýyq adam jazylǵan, oǵan kúnine ortasha eseppen 70 ótinish túsedi. О́z kezeginde Almaty ákimi qala turǵyndarynyń ótinishterin aýdan ákimdikteri men qala basqarmalarynyń qalaı oryndap jatqanyn turaqty nazarda ustaýda jáne barlyq apparattyq keńesterde olarǵa erekshe mán berýde. О́tinishterdiń mańyzdylary erekshe baqylaýǵa alynýda. Qala bıýdjeti ótinishterdi eskere otyryp saralanady jáne naqtylanady. Qarjy naqtyly máselelerdi sheshýge jumsalady, nátıjesinde shaǵymdar sany birtindep azaıady.
Baýyrjan Baıbek jumys sapary kezinde jaqynda ǵana salynǵan ári kásipkerlerdiń tartylys ortalyǵyna aınalatyn ınvestısııalar Úıinde boldy. Kásipkerlik jáne ınvestısııalar basqarmasynan, «Almaty» áleýmettik kásipkerlik korporasııasynan, «Kazakh Invest» ókildiginen ózge munda IT salasy men elektrondy kommersııanyń jetekshi kompanııalarynyń ofısteri ornalasatyn bolady.
Dál sol kúni qala ákimi Ál-Farabı dańǵyly boıyndaǵy úsh qabatty turǵyn úı qurylysynyń qarqynymen tanysty. Investorlardyń aıtýy boıynsha túrǵyndardyń alǵashqy kezegi ornalasqan, az qabatty qurylys bolǵandyǵyna qaramastan joba óziniń ekonomıkalyq jaǵynan rentabeldi ekenin kórsetti.
Eske salsaq, 2016 jyly elimizdiń Tuńǵysh Prezıdenti - Elbasy Nursultan Nazarbaevtyń Ál-Farabı dańǵylynyń joǵary jaǵyna bıik ǵımarattardy salýǵa bolmaıtyndyǵy týraly tapsyrmasynan soń jergilikti bılik mundaǵy nysandardyń enin 15 metrden, al bıiktigin 12 metrden asyrmaý jóninde reglament qabyldaǵan edi.
