Mádenıet jáne sport mınıstri Arystanbek Muhamedıuly Naýryz merekesiniń bar sharapaty kishkentaı búldirshinderge arnalýy kerek dep atap kórsetkendeı, bul qaıyrymdylyq bastama Naýryz merekesinen bastaý aldy.
«Kúltegin» mýltfılmniń 2 seansyna 5000 jýyq bala, onyń ishinde kópbalaly jáne áleýmettik turǵydan az qamtylǵan otbasylardan shyqqan balalar, jetimder úıiniń tárbıelenýshileri, múgedek balalar da qatysty.
Bul qaıyrymdylyq is-shara otandyq mýltfılmder arqyly jas kórermenniń el tarıhyna degen qyzyǵýshylyǵyn arttyrady. Otandyq anımasııalyq týyndylardy kórsetýdegi maqsat – dańqty batyrlardyń erligin, qazaq halqynyń mádenıetin anımasııa arqyly tanytý, sondaı-aq jas urpaqty otansúıgishtikke baýlý. Uıymdastyrýshylar atap ótkendeı, aldaǵy ýaqytta «Qazaqkonsert» pen «Qazaqfılm» uıymdarynyń birlesken bastamasy óz jalǵasyn taýyp, «Qazaqstan» OKZ kınozalynda mýltfılmder jáne qazaq kıno óneriniń basqa da ozyq týyndylary jas búldirshinderge tegin kórsetilmek.
Túrik qaǵanatynyń dańqty áskerı qolbasshysy Kúlteginniń erligi týraly baıandaıtyn bul mýltfılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen. Qazaq jáne orys tilderinde kórsetilgen «Kúltegin» mýltfılmi kishkentaı búldirshinderdiń kóńilinen shyqty. Ata-analar da ıgi is-sharanyń uıymdastyrýshylaryna óz alǵystaryn jetkizdi. Osy oraıda, «Aıala» qaıyrymdylyq qorynyń Nur-Sultan qalasyndaǵy ókili Saltanat Áskerbekqyzy da óziniń jyly lebizin bildirdi:
- «Aıala» qaıyrymdylyq qory QR Mádenıet jáne sport mınıstrligi uıymdastyratyn kóptegen mádenı is-sharalarǵa jıi qatysady. Búgin «Kúltegin» mýltfılminiń qaıyrymdylyq kórsetilimin Nur-Sultan qalasynyń «Balalar úıi» MKM tárbıelenýshileri tamashalady. Buǵan deıin kórsetilgen «Muzbalaq» mýltfılmine arnaıy mektep-ınternattardyń 200 jýyq oqýshysy qatysty. Osyndaı bastamalardy biz árdaıym qoldaýǵa daıynbyz. Ata-ana qamqorlyǵynsyz qalǵan búldirshinderge kóńil bólip, osyndaı qyzyqty ári tanymdyq týyndyny kórýge shaqyrǵan uıymdastyrýshylarǵa alǵysymyz sheksiz.
Eske salsaq, 22, 24 naýryz kúnderi «Muzbalaq» mýltfılmi kórsetilgen alǵashqy qaıyrymdylyq shara 5 600 balany qamtydy.
