О́ziniń tarıh betterin 6 jyl boıy jazyp kele jatqan jas teatr úshin bul óte mańyzdy oqıǵa. Endi Kameralyq zal repertýary odan saıyn túrlene tústi. «PICCOLO» Kameralyq teatry – stýdentter, túlekter, jas vokalısterdiń tanylǵan opera ánshilerimen birge óz sheberlikterin arttyrýǵa arnalǵan shyǵarmashylyq zerthanasy ispetti.
Zalda ıne shanshyr jer joq. Jaıly kameralyq atmosferada, sofıt jaryǵymen qyzyqty oqıǵa oryn ala bastady. Sıýjet boıynsha, Dormonttyń (Ramzat Balakıshıev, Rýslan Sovet) qamqorlyǵynda tárbıelenýshi Djýlııa (Jannat Baqtaı, Saltanat Ahmetova) Dorvılmen (Jan Tapın, Damır Sádýaqasov) qupııa túrde nekelesken, al ol ár túni jibek satymen áıeliniń bólmesine kóteriledi. Dormont bolsa, óziniń tárbıelenýshisin Blanzakka (Evgenıı Chaınıkov) turmysqa bergisi keledi, al oǵan Djýlııanyń bólesi Lıýchılla (Saltanat Muratbekova, Malıka Mınızını) ǵashyq. Aqkóńil qyzmetshi Djermano (Súndet Baıǵojın) Djýlııanyń túnde kúıeýin kútetinin estip ári ony Blanzak dep oılaıdy da, oǵan jibek saty túsiriletinin habarlaıdy...
Keıipkerler qaıta-qaıta kúldirgi jaıttarǵa tap bola berdi, buǵan tamasha áser etken kórermen kúlkisin jasyra almaı, dý qol shapalaqpen ún qatyp otyrdy. Daryndy jas vokalıster men opera sahnasynyń suranysqa ıe sheberleri óz partııalarynyń názik vokaldyq reńkterin berip qana qoımaı, bul qoıylym fars bolǵandyqtan, bir mezette túrli emosııalaryn ym-ısharamen, oınaqy kózqaraspen bildirdi.
Jannat Baqtaı men Saltanat Ahmetova óz minez-qulyqtary, ómirlik tájirıbeleri arqyly árqaısysy ózdiginshe bas keıipkerdiń beınesin somdaǵan. Premeranyń ár kúninde qos ártis rossınılik stıldi, akterlik sheberlikti tamasha meńgergenderin kórsetti, olar jelpýishti epti paıdalanyp, sahnada kerbez qozǵaldy. Jan Tapın men Damır Sádýaqasov osy qoıylymda kóńildes keıipkerdiń beınesin sátti somdap shyqty. Tenorlardyń únderi joǵary deńgeıde boldy. Barıtondar Súndet Baıǵojın jáne Evgenıı Chaınıkov te bıikten kórindi. Osy eki ártistiń sheberligin qos premeralyq kún boıy rahattanyp tyńdaýǵa múmkindik týyndady. Súndet Baıǵojın úlken akterlik darynyn kórsetti, onyń oıyny erekshe tartymdy boldy. Evgenıı Chaınıkov kóńildes keıipkerdiń beınesin ári kúldirgi, ári áserli etip jasady. Dormont partııasyndaǵy Ramzat Balakıshıev pen Rýslan Sovetke barlyq jaǵynan ońaı bolǵany baıqaldy, ekeýi de óz beınelerin jaqsy asha aldy. Tamasha messo-soprano ıeleri ánshiler Saltanat Muratbekova men Malıka Mınızını belkanto tehnıkasyn óte jaqsy ıgergenderin kórsete otyryp, Lıýchılla partııasyn oryndady.
Sahnanyń keremet jıhazdaryn ssenograf ári kostıýmder boıynsha sýretshi Manana Gýnıa (Italııa) jasaǵan, ol kostıýmder men dekorasııalardy venesııalyq karnaval stılinde, dálirek aıtqanda, keıipkerleri kapıtan Frakass, doktor Chýma, arlekın jáne t.b. bolǵan Komedııa del arte negizinde oryndaǵan. Ártister osy kıim úlgilerinde erekshe kórindi, mundaı kózdiń jaýyn alatyn alýan tústi ekzotıka ázirshe salqyn bolyp turǵan elordamyzdyń kórermenderi tarapynan qyzyǵýshylyqpen ári tańdanyspen qabyldandy. Dekorasııalar, kostıýmder jáne beıneproeksııalar XVIII ǵasyr ortasyndaǵy ystyq Italııa eline jeteledi.
Osy operadaǵy mýzyka mátinmen tyǵyz baılanysta boldy. Qoıýshy dırıjer Abzal Muhıtdınov jetekshilik etken orkestr mýzykanttary asqan sheberlikpen óner kórsetti, orkestr quramy orkestr shuńqyrynda emes, tyńdarmandarǵa etene jaqyn bolýy úshin zalda ornalasqandyqtan, kórermender ózderin qoıylymnyń qatysýshysy retinde sezine aldy.
Premera Jastar jyly aıasynda QR Mádenıet jáne sport mınıstrliginiń qoldaýymen úlken jetistikpen ótti. Tyńdarmandar ártisterge ystyq yqylastaryn bildirip, uzaǵynan qol soǵyp, qoshemet kórsetti. Osylaısha, «PICCOLO» Kameralyq teatry shyǵarmashylyq jobasy asqaq ónerdi baǵalaýshylardyń, sondaı-aq jetekshi BAQ-tyń oń pikirin aldy, demek, bul – ony uzaq ta baqytty sahnalyq ǵumyr kútedi degen sóz.
