Olar úshin qarjylaı kóterme aqy men jaldamaly baspana qarastyrylyp qoıylǵan. Qazir jergilikti medısınalyq mekemelerde salalyq mamandar jetispeıdi. Máselen, allergolog pen balalar pýlmonology múldem tapshy. Bulardan ózge terapevt, anestezıolog-reanımatolog, akýsher-gınekolog, hırýrg jáne onkolog syndy mamandar da qat. Osynyń saldarynan kezekti kóp ýaqyt tosýǵa turýǵa týra keledi. Máselen, № 1-shi emhanada terapevttiń qabyldaýyna barý úshin kemi bir aı buryn jazylý kerek. Naýqasy aýyr bala qaıda qaralý kerek degen saýal ata-analardy kóbirek mazalaıdy. № 3-shi qalalyq emhanada balalar okýlısi joqtyǵynan basqa emdeý oryndaryna bolmasa kórshi Reseıge barýǵa májbúr.
Densaýlyq saqtaý basqarmasynyń basshylyǵy problemanyń baryn jasyrmaıdy. Búgingi kúni 230-daı, onyń ishinde aýyldyq jerlerge 80 joǵary dıplomdy maman qajet.
«О́tken jyldan bastap aýyldarǵa joldama alǵan dárigerlerge 1,5 mıllıon teńge mólsherinde bir rettik kóterme aqy beriledi. 58 mamandy qabyldadyq, olardyń 40 shaqtysy aýyldyq jerlerge ornalasty.Qalaǵa kelgen mamandarǵa 500 myń teńge beriledi. Jaldamady pátermen qamtamsyz etiledi», deıdi basqarma basshysy Tımýr Sultanǵazıev.
Sondaı-aq oblys ortalyǵynda qyzmet etetin mamandar «7-20-25» ıpotekalyq baǵdarlamasy boıynsha da baspanaly bola alady. Al aýylǵa baratyn aq halattylar úshin 30 jer úı ázir tur. Alaıda osyndaı qoldaýlarǵa qaramastan kelip jatqan kadrlar áli az. Tyǵyryqtan shyǵý maqsatymen oblys ákimdik tarapynan rezıdentterge arnalǵan 80 grant bólinedi. Bul jaǵdaıda 2-3 jyldyq rezıdentýrany bitirgen mamandarǵa 5 jyl boıy jumys isteý talaby qoıylady.
Byltyrdan beri M.Qozybaev atyndaǵy SQMÝ-da bolashaq medısına qyzmetkerleri dáris alady.
