Semınarda aıtylǵandaı, elimizdiń aýyl sharýashylyǵynda qoldanylatyn ádis-tásilder jańa tehnologııalardyń kómegimen kúsheıe túspek. Mysaly, ósimdik sharýashylyǵyndaǵy dálme-dál eginshilik – osy saladaǵy sharýashylyqtar ıgerýge tıis mańyzdy tásilderdiń biri. Semınarǵa Aqmola, Qaraǵandy, Soltústik Qazaqstan oblystarynan AО́K ókilderiniń arnaıy kelý sebebi de osy. Olar elordadaǵy Qazaq agrotehnıkalyq ýnıversıteti qabyrǵasynda zertteýmen shuǵyldanatyn ǵalymdardyń dárisine qatysyp, ortaq máselelerdi talqylaýǵa múmkindik aldy.
– Bul semınardan alqaptarda kezdesetin aýrýlardyń aldyn alý jáne zııankestermen kúres ádisteri, daqyldardyń ónimdiligin arttyrý tásilderi, jaıylymdardyń elektrondy kartasyn jasaý sekildi jańa aqparattar alyp jatyrmyz. Sharýashylyǵymyzdy damytý úshin bilimimizdi jetildirgimiz keldi. Keıin jumysymyzǵa septigin tıgizedi dep oılaımyn, – deıdi Atbasar aýdanynan kelgen «Bastaý» JShS agronomy Sátbaı Shuǵalov.
Buǵan deıin mundaı semınar Qaraǵandy, Qostanaı, Aqtóbe, Petropavl qalalarynda ótkizildi. Ár uıymdastyrylǵan sabaqtar ózektiligimen erekshelenedi. О́ıtkeni alqaptardy kartografııalaý negizderin oqytý, agroqurylymdar monıtorınginde geoaqparattyq júıelerdi paıdalaný sekildi tyń tásilder aýyl sharýashylyǵyn órkendetý isinde asa qajet.
