Qazirgi kezde Almaty ákimdigi ozyq tájirıbeler negizinde tıimdi ári únemdi jumsaý qaǵıdasy boıynsha bıýdjet shyǵyndaryn ońtaılandyrýda. Belgili bolǵandaı, buryndary Prezıdent Qasym-Jomart Toqaevtyń tapsyrmasy boıynsha negizsiz shyǵyndar 5,5 mlrd. teńgege qysqaryp, «Baqytty otbasy» óńirlik baǵdarlamany qarjylandyrýǵa aýdarylǵan bolatyn.
«Nur Otan» partııasynyń fraksııasymen birge bıýdjet shyǵyndaryna qosymsha saraptama júrgizildi, sondyqtan Qoǵamdyq keńestiń qaraýyna taǵy 7 mıllıard teńgeden astam qarjyny qysqartý usynylady. Buryn qoldaýǵa ıe bolǵan Meńdiqulov, Shýhov kóshelerindegi jáne «Býdennyı», Memlekettik mýzeı janyndaǵy «Jýrnalıster» skverlerin, Jas qanat yqsham aýdanyndaǵy Maıak parkin, 28 gvardııashyl-panfılovshylar atyndaǵy saıabaqty abattandyrý jónindegi jobalardy keıinge qaldyrý usynylady. Bul jobalardy turǵyndar talqylaýy tıis dep esepteımin. Jalpy, bıýdjet qala turǵyndarynyń pikiri negizinde qurylady. Biz shaǵymdar men usynystardy únemi zertteýdemiz», - dedi Baýyrjan Baıbek.
Osylaısha, keri baılanys júıesi retke keltirilýde. Almaty ákimdiginiń barlyq áleýmettik jelilerde resmı akkaýnttary bar, tek Instagram paraqshasyna 200 myńǵa jýyq adam jazylǵan. Kún saıyn 500 ótinish túsýde, olardyń árqaısysy «Open Almaty» biryńǵaı júıesine engiziledi, baqylaýǵa alynyp,saraptalady.
Turǵyndar ótinishteri negizinde bıýdjettiń basym bóligi mańyzdy máselelerge baǵyttalǵan, olar: qalaǵa qosylǵan eldi mekenderdi abattandyrý, qoǵamdyq kólikti damytý, joldar men jeliler, mektep pen bala baqshalar, emhanalar salý. Nátıjesinde shaǵymdar sany 3 ese qysqardy.
Azamattar ótinishterine jedel jaýap qaıtarý úshin Biryńǵaı baılanys ortalyǵy qurylýda, munda qalanyń barlyq basqarmalary, aýdan ákimdikteri, apatty jáne kommýnaldyq qyzmetter bir nómirge biriktirilgen. «Open Almaty» mobıldi qosymshasy onlaın-qyzmet kórsetý boıynsha qalanyń túrli servısteriniń basyn qosyp otyr.
«Keler jyldan bastap «Bıýdjetke qatysý» pılotty jobasyn bastaýdy usynamyn, munda ár aýdanǵa naqtyly soma aýdarylady, al ony turǵyndardyń ózderi mańyzdy baǵyttar boıynsha bóletin bolady. Qala turǵyndary «Open Almaty» júıesi arqyly óz usynystaryn, jobalaryn usynady, olar jarııalanyp, kópshilik daýysqa salynyp, úzdikteri anyqtalady. Usynylǵan jobalarǵa Qoǵamdyq keńes músheleri, sarapshylar, bıýdjettik komıssııa baǵalaryn beredi. Almatyda ár aýdanǵa orta eseppen jarty mıllıard teńge bólýge bolady dep esepteımin. Iаǵnı, segiz aýdanǵa 4 mlrd. teńge nemese qala bıýdjetiniń 1%-y bólinedi», - dedi Baýyrjan Baıbek.
Megapolıs ákimi BUU-nyń usynystaryna sáıkes damyǵan elderdiń bıýdjeti osylaısha 0,5% dan 1%-ǵa deıingi kólemde jasaqtalatynyn aıtty. Bul ashyqtyqtyń bir krıterııi jáne azamattardyń kemeldenýi. Mundaı bastama Londonda, Rımde, Berlınde, Parıjde, Máskeýde engizilgen.
«Bizge qoǵamdyq pikirdi estý ǵana emes, bıýdjettik sheshimderdiń oryndalýyna jaýapkershilikti kúsheıtý ári azamattyq bastamalardy qarjylandyrý mańyzdy. Iske bul turǵydan kelý ózgeniń esebinen kún kórý qaǵıdasyn joıyp, óz qalasyna degen oń kózqarasty nyǵaıtady. Bulardan ózge, qala basqarmalary keri baılanys arnalary arqyly iri jobalardy turǵyndarmen, bıznespen, sarapshylarmen birge talqylaǵandary jón. Qoǵamdyq keńes músheleri bul bastamada barynsha belsendilik tanytýlary tıis dep esepteımin», - dep qorytyndylady sózin Baýyrjan Baıbek.
Eske salsaq, otyrys barysynda «Kókjaılaý jobasyn júzege asyrýdy keıingi qaldyrý jáne bosaǵan qarjyny qalalyq baǵdarmalardy oryndaýǵa jumsaý týraly sheshim qabyldandy.
