«Vırtýaldy sot» dep atalatyn qanatqaqty joba arqyly isterdi onlaın tártipte qaraýǵa bolady. Oblystyq sottyń baspasóz hatshysy Boranbaı Ǵalıevtyń aıtýynsha, qatysýshylarǵa sot otyrysy bolatyn ýaqyt kórsetilgen SMS-habarlama jiberiledi. Habarlama alǵan adam mobıldi beınekonferensııaǵa qosylady. Ol úshin uıaly telefonyna «TrueConf» baǵdarlamasyn ornatýy kerek.
Joba iske qosylǵan ýaqyttan beri munaıly aımaqta 982 is vırtýaldy tártipte qaralǵan. Oblystyq sottyń azamattyq ister jónindegi sot alqasynyń tóraǵasy Manat Kómirshınov eki mekeme arasyndaǵy bereshekti óndirý týraly azamattyq isti jaýapkerdiń jeke shaǵymy negizinde onlaın baılanys arqyly ótken sot otyrysynda qaraǵanyn aıtady. Zań talaptaryna sáıkes sýdıa qaýly shyǵardy. «Jańa tehnologııanyń arqasynda sot tóreliginiń ashyqtyǵy qamtamasyz etiledi. Joba sıfrlyq saýattylyqty arttyrýǵa, ýaqyt pen qarjyny únemdeýge, sot óndirisinde ınnovasııalyq tehnologııalardy qoldanýdy damytýǵa jáne eń bastysy azamattardyń sotqa degen senimin nyǵaıtýǵa yqpal etedi», deıdi Manat Kómirshınov.
Sot júıesinde ınnovasııalyq tehnologııalardy jáne sot júıesin sıfrlandyrýdy qoldanýdy nasıhattaý aıasynda aımaqta jyl basynan beri 43 azamattyq, 9 ákimshilik, 59 qylmystyq is onlaın tártipte qaraldy. IT- tehnologııanyń jańa múmkindikterin paıdalaný arqyly sýdıalardy qaǵazbastylyqtan aryltý da kózdelgen. Qazir óńirdegi 47 sot keńsesi jańa júıe negizinde jumys istep tur.
Atyraý
