Bárin kózimizben kórdik, bizde aty bar, zaty joq qırandyǵa aınalǵan QazKSR deıtin respýblıkany ol kezde eshkim bilmedi, eshkim tanymady. Ne jurttyń alatyn aılyǵy joq, jalaqysy qat, jalań aıaq, jalań bas qalǵan kezeńde osy eldi memleket etemin, dep táýekelge bel býǵan adam ol – Nursultan Nazarbaev. Qudaıǵa shúkir, Qazaqstandy irgeli el etip, memleket qataryna qosty. Ekonomıkasyn qalyptastyryp, ultymyzdyń jaqsy atyn álemge máshhúr ete bildi. Bir sózben aıtqanda, qazaqtyń esiktegi basyn tórge ozdyrdy.
Sóıtip táýelsiz memleket ornatqan kúnnen bastap, Nursultan Ábishuly eldiń týynyń tuǵyrly bolýyna, yntymaǵynyń ydyramaýyna yqpal etýge bar kúshin saldy. Egemen elde birlik pen yntymaq bolmasa, biz búgingideı memleket qura almaıtyn edik. Bul úlken sarabdal saıasatty qajet etedi. Táýbe, qazir Qazaqstan irgeli memleket boldy, álem sanasatyn jaǵdaıǵa jettik. Ár elden elordamyzǵa kelip aqyl-keńes suraıtyn, dárejege kóterildik. Osyndaı bir jaqsy keń jolǵa túskenimizdi sezemiz. Qazaqstannyń bul damýyndaǵy Elbasynyń róli orasan zor.
Osy rette erekshe aıta ketetin taǵy bir tańǵalarlyq nárse ol – Elbasynyń at aýystyrǵany boldy. Bılik almasty, óz erkimen Konstıtýsııamyzǵa sáıkes bılikti Senat Tóraǵasyna berdi. Jáne ol dana sheshim óte durys baǵyt aldy.
Biz Qasym-Jomart Toqaevty kópten bilemiz. Elbasynyń biraz ýaqyttan beri janynda kele jatqan, ishki, syrtqy saıasatty ornyqtyrýǵa úlken eńbek etken, keıingi ýaqytta Senattyń Tóraǵasy retinde de Qazaqstannyń mańyzdy qadamdaryna yńǵaıly yqpal etip, eńbegi sińip kele jatqan azamat.
Bul qazaqtyń kósheli, óresi bıik parasat paıymy tereń tulǵasy. Birneshe shet tildi bilýimen qatar, adamgershiligi, kisiligi joǵary jan. Men ol kisiniń barlyq sheshimin jan-tánimmen qoldaımyn.
Tektiniń urpaǵy, ákesi jaqsy jazýshy, úlken azamat boldy. Al, endi búginde sol tektiden qalǵan tuıaq óresi bıik ónegeli jan ekenin kórsetip otyr.
Prezıdentti halyq saılamaıynsha, onyń ókilettigi de tolyq júre qoıady dep oılamaımyn. Sondyqtan, endi ne de bolsa táýekelge bel býyp, ýaqyty kelgen tusta Prezıdent Q.Toqaev saılaýdy merziminen buryn taǵaıyndady. Jáne búkil álemge atalǵan saılaýdyń ashyq, zańǵa sáıkes durys ótetinine kepildik beretinin jetkizdi.
Bul saılaý bizdiń ishki ekonomıkamyzǵa da, syrtqy saıasatymyzǵa da yqpal etedi. Saılaý nátıjesinde laıyqty azamat el tizginin alady dep senemin.
Qudaı qalasa, elimizdiń Prezıdentin saılap alsaq, budan da bıik belesterdi baǵyndyratynymyz sózsiz.
Myrzataı JOLDASBEKOV,
memleket jáne qoǵam qaıratkeri
