Aqtaý qalalyq mamandandyrylǵan halyqqa qyzmet kórsetý ortalyǵyndaǵy ashylǵan «Adaldyq dúkenine» QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń basshysy, «Mańǵystaý – adaldyq alańy» jobasynyń teń kýratory Nurgúl Jannazarova, «Azamattarǵa arnalǵan úkimet» MK KEAQ Mańǵystaý oblystyq fılıalynyń dırektory Erbol Baıjigit, qalalyq mamandandyrylǵan HQKO basshysy Murat Tasırov, joba jetekshisi Kıikbaı Eshmanov, mekememe qyzmetkerleri jáne qyzmet alýshylar qatysty.
Ashylý saltanatynda lenta qıǵan qala turǵyny qyzyǵýshylyq tanytyp, atalǵan dúkennen taýaryn alyp ta úlgerdi. Sonymen qatar, kelgen satyp alýshylardyń arasynda dúkenge esepteýish quralyn (kalkýlıator) qoıýǵa usynys bildirgen azamat ta boldy
Endi satýshysyz dúkende kez kelgen azamat arnaıy tólem jáshigine aqshasyn qaldyryp, qalaǵan nársesin ala alady. Iаǵnı, satyp alýshylar dúkende satýshynyń joqtyǵyna qaramastan, adaldyq qaǵıdasyna oraı ózderine ózderi etedi. Dúkenniń basty ereksheligi de osynda.
Agenttiktiń aýmaqtyq departament basshysy Nurgúl Jannazarova mundaı dúkenderdiń ashylýy qoǵam men azamattar arasyndaǵy adamgershilik qasıetterin damytýǵa, meıirimdi, adal bolýǵa jáne ózin-ózi damytýǵa baǵyttalǵanyn atap ótti.
Aıta ketý qajet, Aqtaý qalalyq mamandandyrylǵan halyqqa qyzmet kórsetý ortalyǵyna kúnine shamamen 1500 adam kelip, qyzmet alady. Demek, ortalyqqa kelip-ketýshiler sany aıyna 30 myńǵa jýyq adamdy qamtıdy. Al polısııa basqarmasynda 600-den astam qyzmetker men kelýshiler satýshysyz dúkennen qalaǵan nársesin satyp ala alady. Bul degenimiz – qyzmet alýshylar arasynda jáne qoǵamda senim atmosferasyn qalyptastyryp, ózderin jaqsy, adal tulǵa retinde tanýǵa múmkindik berý. Sondaı-aq, halyqtyń áleýmettik jaýapkershiligin shyńdap, «Sybaılas jemqorlyqqa qarsy ımmýnıtetti» qalyptastyrýǵa áser etetin nysan bolyp tabylady.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń baspasóz qyzmetiniń habarlaýynsha, joba sheńberinde atalǵan dúkenderdiń sany qazirgi tańda júzden asty. Aldaǵy ýaqytta da halyq kóp jınalatyn oryndarda «Adaldyq dúkenderiniń» ashylýy jalǵasyn tabatyn bolady.
