О́ńirlik kásipkerler palatasy ǵımaratynda qyzmet kórsetýdiń 5 aımaǵy jumys isteıdi. «Qarjylandyrý» aımaǵynda «Atameken» mıkroqarjy uıymy, Agrarlyq nesıelendirý korporasııasy, «Damý» kásipkerlikti qoldaý qory, «Kaspıı» ÁKK jáne ekinshi deńgeıli bankter qyzmetteri usynylǵan bolsa, «О́tkizý» aımaǵynda bızneske arnalǵan marketıng, býhgalter qyzmeti, eksporttyq súıemeldeý, taýar ótkizý tizbekteri, memlekettik satyp alý, CT KZ sertıfıkatyn berý, bıznes jáne saýda salasyn basqarý baǵyttary boıynsha qyzmetter kórsetiledi. Al, «Sıfrly qyzmet kórsetý» aımaǵynda «Atameken services» portaly arqyly kásipkerler onlaın rejıminde 8 baǵyt boıynsha qajetti qyzmet túrlerin ala alady, oqý kýrstaryna qatysyp, jobalaryn qarjylandyrýǵa ótinish jibere alady. 2018 jyldyń tamyzynan búginge deıin 544 adam osy qyzmet túrine júgingen. Sondaı-aq, «Quqyqtyq súıemeldeý» aımaǵynda kásipkerlerdiń quqyǵyn jáne zańdy múddelerin qorǵaý qyzmeti usynylady. Kásipkerler arasyndaǵy daýlardy sotqa deıin medıatorlar kómegimen sheshý máselesi nazarda. 2018 jyly Kásipkerler palatasynyń aralasýymen 2,2 mlrd teńge kóleminde kásipkerlerdiń quqyqtary qorǵaldy. Osy kezeńde 133 kásipker quqyqtyq kómek surap habarlasqan bolsa, sonyń 53%-y oń sheshimin tapty. «Oqytý» aımaǵynda «Atameken» kásipkerlerge arnap oqý kýrstaryn júrgizedi, sondaı-aq, jumyspen qamtý, bos jumys oryndary monıtorıngi jaıly maǵlumattar beriledi. О́tken jyly kásipkerler palatasynyń muryndyq bolýymen 2011 adam bilim alyp, jalpy somasy 1,3 mlrd teńge kóleminde 338 joba qarjylandyryldy.
-«Bızneske arnalǵan Úkimet» jobasy arqyly ár kásipker óziniń bıznesin damytý, biliktilikti joǵarylatý men qarjylandyrýǵa qatysty konsýltasııalar men qyzmet kórsetýdiń keń aýqymyn ala alady. Kásipkerlerge barlyq qyzmetterdi bir jerden alýǵa jaǵdaı jasalǵan. Eń bastysy kásipkerler, oryn alǵan máseleniń kúrdeliligine qaramastan, qaıda baryp, júginý qajet ekenin naqty biledi. «Bızneske arnalǵan Úkimet» arqyly biz kásipkerlerge arnalǵan biryńǵaı hab quramyz, bul jumys, jalpy alǵanda, el ekonomıkasyna oń áser etetin bolady. «Atameken» keleshekte atalǵan jobany respýblıkanyń barlyq óńirlerinde mýltıplıkattaýdy josparlap otyr», – dep atap ótti «Atameken» QR UKP Basqarma Tóraǵasy A. Myrzahmetov.
Jumys sapary barysynda Qazaqstan Prezıdenti Qasym-Jomart Toqaev óńirde «Bastaý» jobasy arqyly kásip ashqan iskerlermen kezdesti. Solardyń biri- Altyngúl Qaýqarova. Ol kásipkerlik negizderinen bilim alyp, Shetpe aýylynda balabaqsha ashty. Barlyǵy 10 mln teńge nesıe «Atameken» óńirlik mıkro qarjylyq uıymynan bólindi. Túpqaraǵan aýdanynan Aıtóre Buhaeva stomatologııalyq kabınet ashty. Endi turǵyndar aýdan aýmaǵynan uzamaı-aq keshendi em qabyldaı alady. Quryq aýylynan jas kásipker Kómekbaı Qoıbaǵar túıe sharýashylyǵyn qolǵa aldy. Qazir aýyl halqyn sút ónimderimen qamtamasyz etip otyr.
2018 jyly «Bastaý» boıynsha 1056 adam oqýǵa qatysty, onyń ishinde 305-i jeke kásibin bastap, 1 myńǵa jýyq jumys ornyn ashty.
Jalpy Mańǵystaý oblysynda 2018 jyly kásipkerlik salasyna berilgen nesıe kólemi 11,9 mlrd teńgeni quraıdy. Jalpy somasy 4,8 mlrd teńge 424 jobany sýbsıdııalaýǵa bólindi. «Bıznestiń jol kartasy-2020» baǵdarlamasy boıynsha 168 jobaǵa 3,3 mlrd teńge bólindi, al «Nur kapıtal» baǵdarlamasy sheńberinde 44 jobaǵa 845,4 mln teńge jumsaldy. Al, shaǵyn nesıe retinde 710 jobaǵa 7,1 mlrd teńge bólingen.
Mańǵystaý oblysy
