Emhanada emdelýshilerge arnaıy kópsalaly daıyndyqtan ótken tájirıbeli dárigerler qyzmet kórsetedi. Turǵyndarǵa sapaly alǵashqy medısınalyq-sanıtarlyq kómek berýdi maqsat etken emhanada aqparattyq qoldaý júıesi jumys isteıdi. Sonyń ishinde táýlik boıy qyzmet kórsetetin call-ortalyq, senim telefony jáne emhananyń veb-saıty bar.
Sondaı-aq Qasym-Jomart Toqaev Mańǵystaý О́ńirlik kásipkerler palatasyna bardy.
– «Bızneske arnalǵan Úkimet» jobasy arqyly ár kásipker óziniń bıznesin damytý, biliktilikti joǵarylatý men qarjylandyrýǵa qatysty konsýltasııalar men qyzmet kórsetýdiń keń aýqymyn ala alady. Kásipkerlerge barlyq qyzmetterdi bir jerden alýǵa jaǵdaı jasalǵan. Eń bastysy – kásipkerler máseleniń kúrdeliligine qaramastan, qaıda júginý qajet ekenin naqty biledi. «Bızneske arnalǵan Úkimet» arqyly biz kásipkerlerge arnalǵan biryńǵaı hab quramyz, bul jumys, jalpy alǵanda, el ekonomıkasyna oń áser etetin bolady. «Atameken» keleshekte atalǵan jobany respýblıkanyń barlyq óńirlerinde taratýdy josparlap otyr», – dep atap ótti «Atameken» UKP basqarma tóraǵasy Abylaı Myrzahmetov.
Jumys sapary barysynda Qazaqstan Prezıdenti Qasym-Jomart Toqaev óńirde «Bastaý» jobasy arqyly kásip ashqan kásipkerlermen kezdesti. Solardyń biri – Altyngúl Qaýqarova. Ol kásipkerlik negizderinen bilim alyp, Shetpe aýylynda balabaqsha ashty. «Atameken» óńirlik mıkroqarjylyq uıymy 10 mln teńge nesıe bóldi. Túpqaraǵan aýdanynan Aıtóre Buhaeva stomatologııalyq kabınet ashty. Endi turǵyndar aýdan aýmaǵynan uzamaı-aq keshendi em qabyldaı alady. Quryq aýylynan jas kásipker Kómekbaı Qoıbaǵar túıe sharýashylyǵyn qolǵa aldy. Qazir aýyl halqyn túıe súti ónimderimen qamtamasyz etip otyr.
Jalpy Mańǵystaý oblysynda 2018 jyly kásipkerlikke berilgen nesıe kólemi 11,9 mlrd teńgeni quraıdy. Jalpy somasy 4,8 mlrd teńgege 424 joba sýbsıdııalandy. «Bıznestiń jol kartasy-2020» baǵdarlamasy boıynsha 168 jobaǵa 3,3 mlrd teńge bólinse, «Nur kapıtal» baǵdarlamasy sheńberinde 44 jobaǵa 845,4 mln teńge jumsaldy. Al shaǵyn nesıe retinde 710 jobaǵa 7,1 mlrd teńge baǵyttaldy.
Memleket basshysy Yessenov University-de bolyp, jastarmen kezdesti. Prezıdentti ýnıversıtet basshysy bir top oqytýshylarmen qarsy aldy. Oqý ornynda Memleket basshysyna aldymen Stýdentterge qyzmet etý ortalyǵy tanystyryldy.
Ýnıversıtet rektory Berik Ahmetov Memleket basshysyna ýnıversıtettiń ınfraqurylymy jóninde baıandap, ýnıversıtette engizilip jatqan jańa tyń ıdeıalardy tanystyrdy.
Baıandamadan soń Prezıdent Teńiz akademııasynyń jumysymen tanysty. Memleket basshysynyń nazaryna norvegııalyq Kongsberg kompanııasynyń keme júrgizýshilerdi jáne keme mehanıkterin oqytýǵa arnalǵan joǵary tehnologııalyq trenajerlary kórsetildi. Trenajerlardy jumys kezinde stýdentterdiń ózderi tanystyrǵan bolatyn. Qazirgi tańda Yessenov University stýdentteri Kaspıı teńiz jáne ózen kóligi ınstıtýtynda tájirıbeden ótýde. Atalǵan ınstıtýt – teńiz, ózen jáne aralas «ózen-teńiz» sýlarynda júzetin barlyq úlgidegi kemelerde jumys isteýge quqyǵy bar sý kóligi úshin mamandar daıyndaıtyn Kaspıı mańyndaǵy jalǵyz salalyq bilim berý kesheni. Stýdentterdiń iri salalyq kásiporyndarda, sondaı-aq ózen jáne teńiz flotynyń kemelerinde praktıkalyq daǵdylardy alýǵa múmkindigi bar.
Sondaı-aq Qazaqstan Prezıdenti Qasym-Jomart Toqaev «Aqtaý halyqaralyq teńiz saýda porty ulttyq kompanııasy» aksıonerlik qoǵamyna bardy.
Sapar barysynda Memleket basshysyna Aqtaý teńiz portynyń qazirgi jumystary, Kaspıı teńizi arqyly ótetin júk tasymalyn arttyrýdyń perspektıvalary, sondaı-aq Aqtaý qalasyndaǵy shıpajaı aımaǵynyń ınfraqurylymyn damytý jóninde málimet berildi. Qasym-Jomart Toqaev óndiristik mindetterdi tolyqqandy oryndaýǵa, sonyń ishinde júk tasymaly operasııalaryn júrgizýge, kemelerdi aılaqqa qoıýǵa jáne qyzmet kórsetýge septigin tıgizetin porttyń tehnıkalyq múmkindikterimen tanysty.
Premer-Mınıstrdiń orynbasary Jeńis Qasymbek Aqtaý halyqaralyq teńiz saýda portynyń jahandyq kólik dáliziniń qıylysynda ornalasýy, jylyna 17,7 mıllıon tonna qurǵaq júkterdi, shıki munaı men munaı ónimderin tasymaldaýǵa múmkindik beretinin baıandady.
Sonymen qatar Qazaqstan Prezıdentine «Mańǵystaý» zymyrandy-artıllerııalyq kemesi kórsetildi. Sondaı-aq Qazaqstan Respýblıkasy Qorǵanys mınıstrliginiń Áskerı-teńiz kúshteriniń arnaıy tehnıkasymen, qarý-jaraqtarymen jáne kıim úlgilerimen tanysty.
Memleket basshysynyń Mańǵystaýdaǵy sapary jalǵasýda.
Mańǵystaý oblysy
