- Eldos, bıylǵy maýsymda dzıýdodan birneshe halyqaralyq synda tuǵyrdan kórindińiz. Dese de, sizdi jaraqat jıi mazalap júrgenin bilemiz. Ekaterınbýrgtegi Grand Slam týrnırine de qatyspaýyńyzdyń bir sebebi osy. Qazirgi kezde densaýlyǵyńyz qalaı?
- Allaǵa shúkir, bári jaqsy. Sport bolǵan soń, jaraqat ta qatar júredi. Onyń ústine, jekpe-jek túrinde jaraqat almaý múmkin emes. Mundaı kishigirim syrqattarmen kúrese beremiz. Dárigerler nusqaýyn tolyǵymen oryndap, kelesi jarysqa deıin qalpyma kelýge, babyma enýge tyrysamyn. Bastysy, sporttaǵy ǵumyryńa balta shabatyn, ári qaraı kúresýge múmkindik bermeıtin jaraqattardan saqtasyn. Sportshy úshin budan asqan ókinish joq.
- Buıyrsa, jaqyn arada Qytaıdyń Hohot qalasyndaǵy týrnırge qatysasyz. Sol jarystan bastap Olımpıada oıyndaryna tolyqqandy upaı berile bastaıdy. Ári qaraı álem chempıonaty da alys emes. Basty qarsylastar kimder bolýy múmkin?
- Bıylǵy álem chempıonaty dzıýdonyń otany Japonııada ótedi. Demek, eshkimge de ońaı bolmasy anyq. Dzıýdoda búgin baǵy janyp, barlyq qarsylasyn qoǵadaı japyrǵan sportshy erteń birinshi aınalymda-aq utylýy múmkin. Sol sebepti, eshkimdi bóle jarmaı, qarsylastyń bárine birdeı daıyndalyp, árqaısysymen altynǵa talasatyndaı sezimmen kúresý kerek dep esepteımin. Jalpy alǵanda, sporttyń bul túrinen favorıtter kóp, onyń ishinde japondardyń orny erekshe. О́z jerinde ótetin synda olardyń aıanyp qalmaıtyny anyq. Sondyqtan, ózim japon halqynyń balýandaryn basty qarsylas esepteımin.
- Bıyldan bastap dzıýdoshylar Olımpıada joldamasy úshin tartysýda. Árbir jarysta upaı berilip, reıtıng túzilip otyrady. Ulttyq quramanyń bas bapkeri Aıdyn Smaǵulov sizdi Olımpıadadaǵy basty úmitterdiń birine balap otyr. Jalpy, osylardyń bárine psıhologııalyq turǵydan daıynsyz ba?
- Shyny kerek, mundaı kezeńnen áldeqashan ótip kettim. Talaı jarysqa qatysyp, talaı márte elimizdiń baıraǵyn kóterdim. Tatamıde kil myqtylarmen kúresip júrmin. Sondyqtan, maǵan úmit artylýy da zańdy. Biraq psıhologııalyq turǵydan bul maǵan aıtarlyqtaı áser etpeıdi. О́ıtkeni, men jarys rýhyna úırendim. Men úshin týrnırlerdiń aty ǵana ózgerip turady, al qarsylastardyń barlyǵy da sol burynǵy jigitter. Qarap otyrsam, búginge deıin Olımpıadadan basqa týrnırlerdiń bárinen altyn alyppyn. Rıo oıyndarynyń fınalynda altynǵa qol sozym jerden toqtap, kúmisti qanaǵat tutqanymdy bilesizder. Mine, sol Olımpıada altyny meniń sportty aıaqtamaı, ári qaraı talpynýyma sebepker bolyp otyr. Olımpıadanyń altyny úshin kúresip júrmin. Buıyrsa, sol armanyma jetý úshin bar kúshimdi salamyn.
- Siz álemdegi sheber dzıýdoshylardyń birisiz. Búginge deıin sizge yńǵaısyz qarsylas sanalǵan balýan bar ma?
- Maǵan qarsylastardyń barlyǵy da birdeı. Kerisinshe, kópshilik balýandar úshin men yńǵaısyz sportshy sanalamyn. «Balýanǵa ońy men soly birdeı» demekshi, men oń jaqpen de, sol jaqpen de kúrese beremin. Al kóptegen dzıýdoshylar úshin oń nemese sol jambasy yńǵaıly.
- Hohottaǵy týrnırge daıyndyǵyǵyz qalaı?
- Daıyndyq joǵary deńgeıde ótip jatyr. Bizdiń sportta demalatyn ýaqyt joq. Jarystar tizbegi birinen soń biri jalǵasyp jatyr. Tokıo oıyndaryna joldama alý úshin álem balýandary jantalasýda. Solardyń qatarynda biz de barmyz. Sol sebepti, jeńiske jetip, upaı jınap, lısenzııaǵa ıelik etý úshin bar kúshimizdi salamyz.
