Sońǵy ýaqytta emhana qyzmetkerleriniń qataryn Shyńǵys Ýálıhanov, Saltanat Jumadilova, Rızagúl Qabdolla, Darıǵa Matkenova, akýsher-gınekologtar Zarına Amanqul, Gıýzal Jabaǵına, Olga Amanatıdı sekildi jas mamandar tolyqtyrdy. Jarqyrǵan jańa aýrýhanada dárigerlik qyzmet joldaryn bastaǵan jastar qýanyshty.
Jalpy, emhana basshylyǵynyń málimetinshe, kópshilik turǵyndar qabyldaýǵa jazylýda «Damumed» mobıldy qosymshasyn paıdalanady. Dárigerler óz bólimshelerine tirkelgen adamdardyń densaýlyǵyna monıtorıng jasaı alady. Turǵyndardyń qońyraýyn qabyldaıtyn arnaıy ID telefon ortalyǵy jumys isteıdi. Munda mamandar kóp arnaly telefon arqyly turǵyndardyń saýalyna jaýap berip, olardy dárigerdiń qabyldaýyna jazady. Emhanada ornatylǵan LED ekrandarda mobıldy qosymshany paıdalaný erejeleri bar beınerolıkter udaıy kórsetiledi. «Damumed» mobıldy qosymshasyn paıdalanýshylar dárigerdiń qabyldaýyna jazylýǵa nemese dárigerdi úıge shaqyrtýǵa, jazylǵan reseptilerdi jáne zerthanalyq zertteýlerdiń nátıjelerin qaraýǵa, eńbekke jaramsyzdyq paraqtaryn júkteı alýǵa múmkindigi bar. Al turǵyndar úıde otyryp-aq dárigerdiń qaraýyna jazyla alady. Dárigerdi úıge shaqyrady.
Aq jeleńdi abzal jandar jeke modýl arqyly emdelýshilerdiń barlyq qımyl-qozǵalysyn, emdelý qorytyndylaryn baqylaıdy. Sondaı-aq bólimshege tirkelgen turǵyndardyń tolyq tizimin kóre alady, olardy jasyna, basqa da qajettilikterine qaraı irikteıdi. Bul tizim arqyly skrınıngten ótýge tıisti turǵyndardy anyqtap, em-sharalardyń kestesin túzip, habarlasýǵa tolyq múmkindik bar.
Jýyrda Dúnıejúzilik densaýlyq kúnine oraı «Áleýmettik medısınalyq saqtandyrý qory» jáne «Jastar bastamalaryn damytý ortalyǵymen» birge emhana aýlasynda dárigerlermen birge jastar tańǵy jattyǵý jasady.
– Kez kelgen adam bizdiń qatarymyzǵa qosyla alady. Tańǵy jattyǵýlarǵa apta saıyn kelip turýǵa bolady, – deıdi dárigerler.
Al «Áleýmettik medısınalyq saqtandyrý qorynyń» bas sarapshysy Tatıana Dýbovıktiń aıtýynsha, tańǵy jattyǵýlarǵa shaqyrý arqyly qoǵamnyń nazaryn dárigerlik-skrınıngtik tekserýge aýdarýǵa, aýrý erte anyqtalǵan jaǵdaıda naýqastyń ómiri men eńbekke qabilettiligin, áıel adamnyń bala týý múmkindigin saqtap qalýǵa bolady.
PAVLODAR
