Konferensııa barysynda partııa músheleri 9 maýsymda ótetin prezıdent saılaýy týraly oı-pikirlerimen bólisti. Aqyn Serik Aqsuńqaruly aldaǵy saıası naýqannyń bolashaǵymyz úshin óte mańyzdy shara ekenin atap ótse, Qazaqstan halqy Assambleıasy tóraǵasynyń orynbasary Vıtalıı Tvarıonas otandastarymyzdyń eldegi beıbitshilik, turaqtylyq jáne kelisimdi negizgi tirek etken saıasattyń jalǵasyn tapqanyn qalaıtynyn jetkizdi.
– Partııanyń kezekten tys 19-shy sezinde Nur Otan aldaǵy prezıdent saılaýyna túsetin óziniń úmitkerin usynady. Árqaısymyz Tuńǵysh Prezıdent usynǵan reformalardyń jalǵasyn tapqanyn qalaımyz. Olar ekonomıkalyq, saıası jáne rýhanı jańǵyrtýǵa baǵyttalǵan. Sol sebepti qoǵamnyń ár múshesi aldaǵy saılaýdyń bolýyna jáne onyń tıisti deńgeıde ótýine óz úlesin qosýy tıis, – dedi Vıtalıı Tvarıonas.
Jıynda Nur Otan partııasy Qaraǵandy oblystyq fılıaly tóraǵasynyń birinshi orynbasary Qadısha Ospanova «Halyqqa kómek» jáne «Baqytty otbasy» ulttyq jobalary aıasynda atqarylyp jatqan jumystar jaıyn baıandady.
«Halyqqa kómek» jobasy oblys turǵyndarynyń, onyń ishinde kópbalaly otbasylar men múmkindigi shekteýli balalardy tárbıelep otyrǵan ata-analardyń máselelerin sheshýge baǵyttalǵan. Al «Baqytty otbasy» jobasy boıynsha kópbalaly jáne az qamtylǵan otbasylardyń turmys jaǵdaıyn jaqsartý qolǵa alynbaqshy. Osy joba aıasynda ázirlengen jol kartasy boıynsha olarǵa júıeli túrde jáne quqyqtyq kómek kórsetý, qaýipsizdikterin qamtamasyz etý sııaqty birqatar sharalar josparlanǵan.
Qadısha Ospanova baıandaǵandaı, oblysta «Baqytty otbasy» jobasy boıynsha arnaıy jumys toby qurylǵan. Búginge deıin 237 kópbalaly otbasynyń qatysýymen qabyldaý sharalary uıymdastyrylyp, olardyń ótinish-tilekteri men muń-muqtajy tyńdalǵan. «Bul jumystar ary qaraı da jalǵasatyn bolady», dedi Q.Ospanova.
Konferensııa jumysyna Nur Otan partııasy Qaraǵandy oblystyq fılıalynyń tóraǵasy, oblys ákimi Erlan Qoshanov tóraǵalyq etti.
Qaraǵandy oblysy
