Shaǵyn bıznes sýbektilerin sıfrlandyrýdy fıskaldyq qoldaý maqsatynda «Qazaqstan Respýblıkasynyń keıbir zańnamalyq aktilerine bıznes-ortany damytý jáne saýda qyzmetin retteý máseleleri boıynsha ózgerister men tolyqtyrýlar engizý týraly» 2019 jylǵy 2 sáýirdegi № 241-VI Qazaqstan Respýblıkasynyń Zańymen patent nemese ońaılatylǵan deklarasııa negizinde arnaýly salyq rejıminderin qoldanatyn dara kásipkerler úshin kózdelgen kelesi túzetýler Salyq kodeksine engizildi:
1) salyqtyq kezeńde eseptelgen jeke tabys salyǵynyń somasy derekterdi tirkeý jáne berý fýnksııasy bar bir baqylaý-kassa mashınasyn (onlaın BKM) satyp alýǵa 60 000 teńge somasyna, biraq eseptelgen salyq somasynyń 50 paıyzynan asyrmaı azaıtylady.
Atalǵan norma tek bir jyl ǵana júzege asyrylady (2019 jyl), sebebi onlaın BKM-yn jappaı ornatý 2020 jyldyń 1 qańtaryna deıin aıaqtalýy tıis;
2) jeke tabys salyǵynyń somasy úsh quramdasty ıntegrasııalanǵan júıeni (onlaın BKM, POS-termınal, ERP júıesi) satyp alýǵa 60 000 teńge somasyna, biraq eseptelgen salyq somasynyń 50 paıyzynan asyrmaı azaıtý.
Atalǵan jeńildik 3 jyl ishinde júzege asyrylady (2019 jyldyń 1 qańtarynan 2022 jylǵy 1 qańtaryna deıingi merzimde).
Anyqtama úshin: úsh quramdasty ıntegrasııalanǵan júıe – derekterdi tirkeý jáne berý fýnksııasy bar baqylaý-kassa mashınasynan, qolma-qol aqshasyz tólemderdi qabyldaýǵa arnalǵan júıeden (qurylǵydan), sondaı-aq saýdany basqarýdy, qyzmetter kórsetýdi, jumystar oryndaýdy jáne taýarlardyń esepke alynýyn avtomattandyrý júıesimen jaraqtandyrylǵan jabdyqtan (qurylǵydan) nemese ıntegrasııalanǵan júıeniń barlyq úsh quramdasyn almastyratyn baǵdarlamalyq-apparattyq keshennen turatyn ıntegrasııalanǵan júıe.
Bul rette, úsh quramdasty ıntegrasııalanǵan júıege jáne ony esepke alýǵa qoıylatyn talaptardy, ony ornatý jáne qoldaný tártibin ýákiletti organ memlekettik josparlaý salasyndaǵy ortalyq memlekettik organmen, baılanys salasynda memlekettik saıasatty iske asyrýdy júzege asyratyn ýákiletti memlekettik organmen jáne Qazaqstan Respýblıkasynyń Ulttyq Bankimen kelisý boıynsha belgileıdi.
Osydan basqa, atalǵan Zańmen qolma – qolsyz tólemderdi yntalandyrý maqsatynda, ońaılatylǵan deklarasııa negizindegi arnaýly salyq rejımin qoldanatyn dara kásipkerler úshin úsh quramdasty ıntegrasııalanǵan júıeni mindetti túrde qoldanýmen ótkizilgen qolma – qolsyz aınalymdy 114 184 AEK mólsherindegi QQS boıynsha shekke, 70 048 AEK mólsherindegi ońaılatylǵan deklarasııa negizindegi arnaýly salyq rejımin qoldaný úshin jarty jyldyq tabysqa qosylmaýy qarastyrylǵan.
