Almatylyq kásipker Aıan Kósherbaev - «House of students» jataqhanasynyń ıesi. Ǵımarat stýdentterdiń jataqhanasy retinde salynǵan, alaıda ol jerdegi yńǵaılylyq áldeqaıda joǵary deńgeıde. Mysalyǵa keltiretin bolsaq, árbir bólmede jýynatyn bólme men sanýzel, kıim men aıaq kıimderdi yńǵaılastyryp qoıatyn shkaftary bar bólmeler qarastyrylǵan. Sondaı-aq jataqhananyń ishinde sporttyq zal, turatyndarǵa arnalǵan jeńil baǵamen meıramhana, bloger-stýdentter úshin keńse jáne týragenttik qyzmet etedi.
«Stýdentter jataqhanasyn salý ıdeıasy Qazaqstanǵa sheteldik stýdentterdi ákelýmen aınalysqannan keıin oıǵa keldi. Almatyǵa úndister, qytaılar, pákistandyqtar kele bastaǵanda, olardy ornalastyratyn oryn bolǵan joq. Ýnıversıtet jataqhanalarynda oryn jetispeýshilik máselesi bar. Sol sátten bastap, biz jataqhana ashýdy qolǵa aldyq. Jobany iske qostyq, ol tabysty nátıjesin berdi. Qazirgi tańda bizde 450 stýdent turady, olardyń jartysy sheteldikter. Stýdentterdiń basym kópshiligi medısına ýnıversıteti, QazUÝ, KazATISO, UIB stýdentteri. Eń qyzyq aıtarlyq jaǵdaı, biz óz qyzmetterimizdi asa jarnamalaǵan joqpyz. Birinshi kúni 10 adam qonystandy, al bir aı ishinde 150 adam qonystandyrdyq. Stýdentterdiń bir-birine bizdiń hostel týraly aıtyp, jarnamalaýlary áser etti», - dep aıtty Aıan Kósherbaev óz sózinde.
Jataqhana Almaty qalasy Almaly aýdanynda ornalasqan, bul, árıne, onyń suranysyna áser etpeı qoımaıdy. Bir adamǵa turý quny aıyna 20 myń teńgeni quraıdy. Bul JOO jataqhanalarynan qymbattaý, biraq páterdi jalǵa alýdyń janynda arzan.
«Men Qazaqstanda medısınalyq bilim alýdy tańdadym, sebebi ol QHR-da nemese Fılıppınde bilim alý sııaqty joǵary baǵalanady, biraq bul jaqtyn oqý baǵasy áldeqaıda qolaıly. Mysalyǵa aıtatyn bolsaq, Úndistanda medısına oqýy jylyna kem degende 45 000 dollar turady, al munda men tek 7 000 dollar tóleımin. Bul jaqta 6 jyl oqýymdy oqyp, keıin otanyma qyzmet etýge ketemin. Bizde dárigerler bárinen joǵary tabys tabatyn qyzmetkerler qatarynda, olardyń jalaqysy qazaqstandyq ólshem boıynsha 1 mln teńgeni quraıdy. Bizdiń bólmede 3 qyz turamyz, olardyń barlyǵy Indııadan kelgen. Bizge munda turý óte yńǵaıly, sondaı-aq jataqhanadaǵy meıramhanada úndi taǵamdary da beriledi», - deıdi Qashǵardan kelgen 19 jasar Mıthad Asofı.
Asylbek Januzaqov – Ál-Farabı atyndaǵy QazUÝ-niń fızıka-tehnıkalyq fakýltetiniń 1 kýrs stýdenti, Tarazdan kelgen. Bos ýaqytynda ol beıne rolık túsirip, olardy óndeıdi, ınstagramda stýdenttik ómir týraly beıneblogyn júrgizedi. Mundaı belsendilikti baıqaǵan jataqhana ıesi Asylbekke tegin turýǵa múmkindik bergen.
«Biz shyǵarmashyl, belsendi jastarǵa qoldaý kórsetkimiz keledi. Kelesi oqý jylynan bastap stýdentter úshin 100 tegin oryn bólýdi josparlap otyrmyz. Shartty túrde, biz olardy úsh jeńildikti topqa bóletin bolamyz: belsendi balalar, kóp balaly otbasynan shyqqan jáne turmysy tómen balalar úshin dep. Mysalyǵa, eger olardyń ata-analarynda nesıeler kóp bolsa, stýdentter shyn máninde tóleýge qınalsa, biz árqashan olarǵa jeńildikter berýge tyrysamyz. Men tek jaqsy oqıtyndardy ǵana emes jalpy alamyn, ózimde mektep qabyrǵasynda asa joǵary oqıtyndardyń qatarynda bolmadym. Mende stýdent bolǵanmyn jáne bala kezimnen óz memleketime qandaı da bir paıda ákelgim keldi. Stýdentterdiń jaıly jaǵdaıda ómir súrgeniń qalaımyn, sebebi sapaly bilim men tyń oılar jaqsy turmystyq jaǵdaıdan keledi, bul bizdiń bolashaǵymyz», - dep aıtty Aıan Kósherbaev.
Jas kásipkerdiń mundaı jobalary Qazaqstannyń basqa aımaqtarynda da bolatyn bolady. Semeıde 1200 oryndyq stýdenttik jataqhana jumys isteıdi, 800 oryndyq taǵy bir jataqhana Astanada iske qosylady. Sonymen qatar, Almatydaǵy jataqhana 2700 orynǵa deıin keńeıtiledi, qazirgi tańda qosymsha qurylys jumystary júrip jatyr.
Stýdenttik jataqhanalardy qarjylandyrý múmkindikteri týraly bilgen Aıan Kósherbaev memlekettik-jeke menshik áriptestik (MJS) baǵdarlamasyna qatysýǵa sheshim qabyldap otyr. Memlekettik tapsyrysqa sáıkes, QR Bilim jáne ǵylym mınıstrligi turǵyndardy jataqhanamen qamtamasyz etedi jáne jyl saıyn ár tósek-oryn úshin 122 aılyq eseptik kórsetkish tólenedi, onyń ishinde ǵımaratty qaıta jańǵyrtýǵa 47 aılyq eseptik kórsetkish tólenetin bolady. Tólem kezeńi 8 jyldy quraıdy. Atalǵan jobany júzege asyrý úshin 152 mlrd teńge bólindi. Baǵdarlamaǵa qatysýǵa ótinimderdi «Atameken» Ulttyq kásipkerler palatasy qabyldaıdy.
«Bul joba shyǵyndy bolsa da, men oǵan qatysatyn bolamyn. О́ıtkeni meniń jobalarym óte kóp, al bul áleýmettik joba. Men ózim jaqynda ǵana JOO bitirdim, sondyqtanda stýdenttterdiń jaǵdaıyn jaqsy túsinemin. Osy oraıda men úshin patrıotızm paıdadan áldeqaıda mańyzdy», - dep Aıan Kósherbaev oılaıdy.
Esterińizge sala ketsek, 2018 jyldyń 5 naýryzynda «QR Prezıdenti N.Nazarbaevtyń Bes áleýmettik bastamasy» aıasynda stýdent jastardyń ómir súrý jaǵdaıyn jaqsartý boıynsha mindetter qoıǵan bolatyn. MJS baǵdarlamasy asynda 2022 jylǵa deıin stýdenttik jataqhanalarǵa 75 myń jańa oryn engizý josparlanýda. Búgingi tańda jataqhanalarǵa 91 000 qazaqstandyq stýdent muqtaj, onyń 30 000-y Almatyda turatyndar.
