Almatydaǵy «Dostyq úıinde» ótken poezııa jáne proza jınaqtarynyń tanystyrylymyna osy jobaǵa qatysqan Ulybrıtanııa, Ispanııa, Fransııa, Reseı, Qytaı, Egıpet jáne Taıaý Shyǵys elderi aýdarmashylary men ádebıetshileri, aýdarma jáne baspa uıymdarynyń basshylary, shyǵarmalary alǵashqy antologııalarǵa kirgen avtorlar qatysty.
QR Prezıdenti ákimshiligi Ishki saıasat bóliminiń meńgerýshisi, «Jahandaǵy zamanaýı qazaqstandyq mádenıet» jobasyn iske asyrýǵa jaýapty jumys tobynyń jetekshisi Aıda Balaeva, qazaq ádebıetiniń úzdik úlgilerin BUU-nyń 6 tiline aýdaryp, taratý – ult tarıhyndy buryn-sońdy bolmaǵan, qazaq mádenıetin álemge tanystyrý turǵysynan teńdesi joq bastama ekenin aıtty. 160 qazaqstandyq avtordyń tańdamaly shyǵarmalary bir mezette álemniń eń iri 6 tiline aýdarylyp, sol tilderde jumys isteıtin eń bedeldi baspalardan shyǵyp, 5 qurlyqtaǵy 90-nan asa eldiń joǵary oqý oryndary, kitaphanalary men ǵylymı ortalyqtaryna jetedi. Jalpy sany 2 mıllıard 600 mıllıon halyq qazirgi qazaq ádebıetiniń jaýharlarymen tanysýǵa múmkindik alady», – dedi A.Balaeva.
Joba aıasynda aýdarma sapasyn qamtamasyz etý máselelerine erekshe mán berildi. 6 tilde jumys isteıtin sheteldik aýdarmashylar men baspagerler Qazaqstanǵa arnaıy kelip, elimizdiń tarıhy men mádenıetimen tanysty. Ulybrıtanııa, Ispanııa, Reseı, Fransııa jáne Qytaı elderinen kelgen aýdarmashylar men áriptes baspa uıymdarynyń ókilderi qazaq avtorlarymen jeke-jeke suhbattasyp, aýdarma barysynda týyndaǵan suraqtardy talqylady. Bul aýdarmany túpnusqa mátinge meılinshe jaqyndatyp, onyń kórkemdik sapasyn qamtamasyz etýge zor úles qosty.
Qazirgi qazaq ádebıeti jınaqtaryn aǵylshyn tiline aýdarý, basyp shyǵarý jáne taratý jumysy Kembrıdj ýnıversıteti baspasynyń qatysýymen iske asty. Tanymal ýnıversıtet baspasy jobaǵa tájirıbeli aýdarmashylar men bedeldi ádebıetshi mamandardy tartty.
Qazaq ádebıeti úlgilerin ıspan tilinde sóıletýge Ispanııa mádenıet mınıstrligi qoldaý kórsetip, «Servantes ınstıtýtynyń» keńesi boıynsha kitaptardy basyp, taratýǵa ádebı aýdarmaǵa mamandanǵan «Visor» baspasy jaýapty.
Antologııalardyń fransýz tilindegi nusqasyn daıyndaýǵa Parıj qalasynyń merııasy qamqorlyq jasap, jınaqtardy shyǵarý «Mıshel de Mol» atty bedeldi fransýz baspa úıine tapsyryldy. Orys tilindegi aýdarma men ádebı redaksııa jumysyn úılestirýge Reseı Jazýshylar odaǵynyń máskeýlik uıymy, al jınaqty basyp shyǵarý men taratýǵa M.Lomonosov atyndaǵy Máskeý memlekettik ýnıversıtetiniń baspasy atsalyspaq.
Qazaq ádebıeti jınaqtaryn qytaı tiline aýdarý, basyp shyǵarý jáne taratýǵa Qytaı Halyq Respýblıkasynyń «Ulttar baspasy» jaýapty. Jınaqtardy arab álemine Egıpet Arab Respýblıkasynyń Mádenıet jáne bilim ortalyǵynyń qoldaýymen Taıaý Shyǵys elderine tanymal «MediaHub» baspasy tanystyrady.
Joǵaryda atalǵan seriktes-uıymdar aýdarma, basyp shyǵarý, taratý-nasıhattaý jumystaryna jalpy sany 70-ten asa maman jumyldyrdy.
Joba QR Mádenıet jáne sport mınıstrliginiń tapsyrysy boıynsha «Ulttyq aýdarma bıýrosy» qoǵamdyq qorynyń úılestirýimen júzege asýda.
