Forýmnyń kún tərtibi álemdik ekonomıkanyń, ónerkásiptiń jáne tehnologııalardyń jańa salalaryn damytý, sondaı-aq Qazaqstannyń jáne álemniń basqa elderiniń aldynda turǵan jahandyq syn-qaterleri syndy mańyzdy máselelerdi talqylaýdy qamtıdy.
XII Astana ekonomıkalyq forýmynyń basty taqyryby – Shabyttandyrýshy ósim: Adamdar, Qalalar, Ekonomıkalar. Is-sharaǵa qatysýshylar turaqty ósýdiń jańa joldaryn, adam kapıtalynyń damýy men bilim jáne ınnovasııa halyqaralyq ortalyqtary esebinde qalalar áleýetin kúsheıtýdi talqylaıdy.
AEF is-sharalary dástúrli túrde paneldi sessııa, dóńgelek ústel, konferensııa jáne bıznes-dıalog formatynda ótedi. Forýmda barlyǵy 50 ıvent josparlanǵan. XII Astana ekonomıkalyq forýmy alańyndaǵy eń mańyzdy is-sharalar: el basshylyǵynyń qatysýymen ótetin sessııalar, jahandyq komıssııanyń eńbek bolashaǵy jónindegi baıandamasyn zertteý jáne talqylaý úshin halyqaralyq eńbek uıymynyń (HEU) 100 jyldyǵyna oraı Halyqaralyq konferensııasy, 2020 jyly Dúnıejúzilik saýda uıymynyń (DSU joǵarǵy organy) 12-shi Mınıstrlik konferensııasyn daıarlaý jónindegi aralyq otyrysy, BUU aıasynda turaqty damý maqsattary boıynsha birinshi qazaqstandyq forýmy, G-Global Halyqaralyq Hatshylyǵynyń qoldaýymen álemdik zııatkerlik elıta jáne QR úkimetiniń qatysýymen strategııalyq sessııasy, Kavkaz jáne Ortalyq Azııa elderiniń, Eýrazııalyq ekonomıkalyq odaǵyna múshe memleketterdiń jáne Mońǵolııa qarjy mınıstrleri men ortalyq bankter basshylarynyń dóńgelek ústeli.
Bıylǵy jyly EXPO Kongress-ortalyǵynda jáne Hilton Astana-da ótetin AEF-2019 5 myńǵa jýyq adam qatysady. Solardyń jartysy – álemniń 100-den astam elinen kelgen sheteldik delegattar. Búgingi tańda ózderiniń qatysatyndyqtaryn rastaǵan halyqaralyq qonaqtar: Pol Romer, ekonomıka boıynsha 2018 jylǵy Nobel syılyǵynyń laýreaty, Dúnıejúzilik banktiń bas ekonomısi (2016-2018); Krıstın Lagard, Halyqaralyq valıýta qorynyń Basqarýshy-dırektory; Stenlı Fısher, AQSh Federaldyq rezervi Tóraǵasynyń orynbasary (2014-2017); Rae Kvon Chýng, 2007 jylǵy álemdik Nobel syılyǵynyń laýreaty, Inchhon memlekettik ýnıversıtetiniń (Koreıa Respýblıkasy) qurmetti professory; Rısto Sıılasmaa, Nokia kompanııasynyń Dırektorlar keńesiniń tóraǵasy, F-Secure Corporation negizin qalaýshy; German Gref, Reseı Sberbankiniń Prezıdenti jáne Basqarma Tóraǵasy; Armıda Alısdjabana, BUU Bas Hatshysynyń orynbasary, Azııa jáne Tynyq muhıtyna arnalǵan ekonomıkalyq jáne áleýmettik komıssııanyń (ATMEÁK) atqarýshy hatshysy.
AEF-2019 osyndaı belgili saıasatshylar men sarapshylardyń qatysýy –is-sharanyń ózine qyzyǵýshylyqtyń arta túskendiginiń kórsetkishi ǵana emes, sonymen qatar, ashyq dıalog pen ózara yntymaqtastyqqa daıarlyqtyń belgisi. Forýmda eki kúnniń ishinde 100-ge jýyq spıker sóz sóıleıdi.
