5 MEDALMEN ORALDY

Germanııanyń Frankfýrt qalasynda bokstan jastar arasyndaǵy halyqaralyq týrnır máresine jetti. Londonda 2012 jyly ótetin Olımpıadany mejelegen osynaý básekege qatysqan 17 eldiń úmit úkilegen ulandary arasynda bizdiń boksshylar 3 altyn jáne 2 kúmis medalǵa ıe boldy. Bul týrnırge ómirden erte ozǵan talant ıesi Bekzat Sattarhanov bastaǵan, keıin de osal túse qoımaǵan ózge bedeldi boksshylarymyz jalǵas­tyr­ǵan, asa jeńil salmaqtaǵy jeńisterimiz munda da úzilmedi. 48 kılo salmaqta Almaty boks mektebiniń túlegi Ánýar Mus­ta­faev altynnan alqa taqty. Bir jaq­sysy, boks­shy­larymyz jeńil jáne orta sal­maq­t­arda turaqty túrde úzdik nátıjelerge jetip júr. Muny osy týrnırdegi bizdiń qorjynymyzǵa tús­ken qaraǵandylyq Rýslan Mádıevtiń (54 kg) altyny da aıqyn dáleldeıdi. Qazaq boksshylarynyń Germanııa jerindegi al­tyny bunymen shektelip qalmady. 81 kılo sal­maqta Arbek Ábdiǵanıev (Taraz) nemis sharshy alańynda sheberlik tanytyp úshinshi altyndy jeńip aldy. Onyń bul jeńisi, bizdiń buǵan deıingi aýyr salmaqtaǵy birqatar bedeldi boksshylarymyz jasyna qaraı rıngten ketýinen qońyltaqsyp qalǵan kóńilimizdi bir demdegen utysqa aınaldy. Astanalyq Nurlan Ábjanovtyń (51 kg) kúmis medali de qýanyshty oqıǵa der edik. Al 69 kılo salmaqta taǵy bir kúmisti jeńip alǵan Almaty oblysynyń túlegi Jánibek Álimhanuly tabysy, sóz joq, jalpykomandalyq jetistikti eseleı tústi. Jas boksshylarymyzdyń Germanııada jetken úzdik tabystary Qazaqstan boks federasııasynyń byltyrǵy jyl qorytyndysyndaǵy, aıtarlyqtaı deńgeıdegi nashar kórsetkishterden, ashyq atap kór­se­tilgen kemshilikterden mamandarymyzdyń ońdy sa­baq alǵandaryn da aıqyndasa kerek. Jas­ós­pirimderimiz ben jastar arasynda qazirdiń ózinde, jas­tyǵyna qaramastan, baıypty da kánigi boks óne­rin kórsetip júrgen jigitter jetkilikti. Biz dál qazir Sıngapýrde ótetin I Jastar olımpııalyq oı­yn­daryna asqan yjdaǵattylyqpen daıyndyq ja­saý­damyz. Al bul týrnır jas boksshylarymyzdyń sol basty básekelerge daıyn­dyqtarynyń naq bıik deń­geıine jetken kúıde bolýyna jasalar basty saı­ys­t­arymyzdyń biri dep baǵalap otyrmyz, – deıdi Qazaqstan jastar qura­ma­sy­nyń aǵa bapkeri Nazar Ilııasov. Dastan KENJALIN