BIRYŃǴAI TÁRTIP ENGIZÝDI KО́ZDEIDI

Parlament Senatynda Ekonomıkalyq jáne óńirlik saıasat komıtetiniń uıymdastyrýymen “Jer qoınaýy jáne jer qoınaýyn paıdalaný týraly” zań jobasynyń tusaýkeseri boldy, dep habarlady osy palatanyń baspasóz qyzmeti. Jıynda negizgi baıandama jasaǵan Energetıka jáne mıneraldy resýrstar mınıstrliginiń jaýapty hatshysy Qanatbek Safınov sharaǵa qatysýshylardy zań jobasynyń tujyrymdamasymen tanystyrdy. Ol jer qoınaýyn paıdalanýǵa qatysty qatynastar qazirgi kezde “Jer qoınaýy jáne jer qoınaýyn paıdalaný týraly” jáne “Munaı týraly” zańdarmen retteletini jaıynda aıta kelip, joba osy salaǵa qatysty zańdardy odan ári jetildirýge jáne júıelendirýge, jer qoınaýynyń ıesi retindegi memlekettiń múddesin qorǵaýdy qamtamasyz etýge arnalǵanyn atap ótti. Zań jobasymen jer qoınaýyn paıdalaný quqyǵy jáne osyǵan qatysty nysandardyń qozǵalysyna memlekettik baqylaý jasaý, memlekettiń basym quqyǵyn iske asyrýdy dál resimdeý, jer qoınaýyn paıdalaný kelisimderiniń úlgisi retinde ónimdi birlese bólýden bas tartý belgilenip otyr. Zań jobasy jer qoınaýyn paıdalaný quqyǵyn berýge konkýrs ótkizý resim­deri men tikeleı kelissózder negizinde shart jasasý tártibin, son­daı-aq paıdaly qazbanyń qandaı túri bolsa da jer qoınaýyn paıdalaný quqyǵyn berýdiń biryńǵaı tártibin engizýdi kózdeıdi. Jer qoınaýyn paıdalaný salasyndaǵy aktıvterdi satyp alý-satý jónindegi mámilelerdi belsendilendirý jaǵdaıynda ekonomıkalyq qaýipsizdikti qamtamasyz etýdegi zań jobasynyń mańyzdylyǵyn atap óte kelip, Q.Safınov osy saladaǵy aktıvterdi alypsatarlyqpen tartyp alý múmkindigin boldyrmaıtyn erejelerge nazar aýdardy. Zań jobasyna tek taýarlar, jumystar, qyzmet kórsetýler ǵana emes, mamandarmen qamtamasyz etýde de “qazaqstandyq maz­mundy” qarastyratyn ózgerister usynylyp otyr. Talqylaý barysynda Q.Safınov depýtattardyń saýaldaryna jaýap berdi.